En'gliyelik bezi sermayidarlar xitay shirketlirige meblegh sélip, Uyghurlarning depsende qilinishigha yardem bérish bilen eyiblendi

Muxbirimiz erkin
2019-07-15
Élxet
Pikir
Share
Print

En'gliyediki bezi sermayidarlar Uyghurlarning kishilik hoquqni depsende qilishqa qatnishiwatqan xitay téxnologiye shirketlirige meblegh sélish bilen eyiblen'gen.

En'gliye "The Times" ("Waqit") gézitining 15‏-iyul ashkarilishiche, en'gliye parlaméntining bezi ezaliri abérdén standart meblegh sélish shirkiti, fidélity, srödér qatarliq pénsiye fondi we meblegh guruhlirini öz ichige alghan bezi en'gliye sermayidarlirining xeykang, daxu'a qatarliq xitay téxnologiye shirketliride 800 milyon fond stérling pay chéki barliqini ashkarilighan.

Xewerde, bu shirketlerning meblighining xitayning Uyghur rayonida kishilik hoquqni depsende qilishigha yardem bériwatqanliqi tekitlen'gen. Gherbtiki bezi sermayidarlarning xitay téxnologiye shirketlirige meblegh sélip, uning Uyghurlarni basturushi we teqiblishige yardem bériwatqanliqi yéngi ashkarilan'ghan mesile bolmisimu, lékin bu en'gliye taratqulirining tunji qétim buninggha bezi en'gliye sermayidarlirining ishtirak qilghanliqini pash qilishidur.

Ilgiri amérikadiki bezi shirketlerning xeykang, daxu'a qatarliq xitay téxnologiye shirketlirige meblegh salghanliqi ashkarilan'ghan. Bezi orunlar qolidiki bu ikki shirketning pay chékini sétiwétidighanliqini bildürgen. Xitayning xeykang téxnologiye shirkiti bilen daxu'a téxnologiye guruhi xitay hökümitining Uyghur rayonida digital nazaret sistémisi qurushi, 2 milyondek Uyghur we bashqa xelqlerni lagérlargha qamashtek qilmishlirida uninggha téxnikiliq yardem bérip, ghayet zor paydigha érishken. Netijide, bu ikki shirketning pay chéki téz ösüp, bezi gherb sermayidarlirining qiziqishini qozghighan idi. En'gliye "The Times" gézitining xewiride, xeykang shirkitining az dégende Uyghur rayonidiki ikki atalmish "Qayta terbiyelesh lagéri" ning kamérasini teminligenliki, bu lagérlarda bir milyondek Uyghurning tutup turuluwatqanliqi tekitlen'gen. Xewer qeyt qilinishiche, en'gliye parlamént ezaliri bezi en'gliye sermayidarlirining xeykang we daxu'a téxnologiye shirketlirige meblegh sélip, Uyghur rayonidiki éghir kishilik hoquq depsendichilikini qolaylashturghanliqini bildürgen.

Toluq bet