Amérika hökümiti xitay téléfon shirkitining amérikadiki pa'aliyitini chekligen

Amérika hökümiti xitayning dölet igilikidiki xitay téléfon shirkitining amérikadiki meshghulatini dölet bixeterliki endishisi seweblik chekligen. Bu heqtiki xewerlerde éytilishiche, amérika hökümitining bu qarari dunyadiki bu ikki chong iqtisadi küchning ‍ixtilapini téximu ötkürleshtüridiken. Amérika fédératsiye xewerlishish komitéti 26-öktebir xitay téléfon shirkitining 60 kün ichide amérikadiki pa'aliyitini toxtitishini telep qilghan.

Amérika simliq xewerler tori-s n n ning xewer qilishiche, amérika fédératsiye xewerlishish komitéti xitay téléfon shirkitining amérikadiki tarmaq shirkiti “Xitay hökümitining paydilinishi, tesiri we kontrolluqida” ikenliki, bu shirketning yene xitaydek “Yéterlik musteqil edliye nazaretchiliki bolmighan bir dölette, xitay hökümitining teleplirini orundashqa mejbur bolush éhtimalliqi yuqiriliqi” ni bildürgen.

Mezkur komitétning éytishiche, ular bu shirketke ötken yili 12-ayda amérikaning endishilirini peseytish pursiti bergen bolsimu, biraq bu shirket buni qilmighan.

Amérika fédératsiye xewerlishish komitéti bu heqtiki bayanatida: “Dölet bixeterlikini ilgiri sürüsh komitétning jama'et menpe'etini ilgiri sürüshtiki mes'uliyitining bir qismi. Bügünki heriket dölet alaqe ul eslihelirini yoshurun bixeterlik tehditidin qoghdash wezipisini ijra qilidu” dégen. Bayanatta körsitilishiche, xitay téléfon shirkiti we xitay hökümitining amérika alaqe sistémisigha érishish pursiti, ularning amérikada jasusluq we bashqa ziyanliq heriketler bilen shughullinishigha yol échip bérip, amérikaning dölet bixeterliki we qanun ijra qilishigha zor xewp yaratqan.