Американиң уйғурларниң кишилик һоқуқини дәпсәндә қилишқа четишлиқ карханиларни җазалиши японийә карханилириғиму тәсир көрситидикән

Мухбиримиз җәвлан
2020-11-12
Share

"японийә асия обзури" ториниң 12-ноябир хәвәр қилишичә, хитайниң уйғурларниң кишилик һоқуқини еғир дәпсәндә қилиши көпләп әйиблиниватқан һәмдә америка вә ғәрб әллириниң уйғур мәсилисигә четишлиқ карханиларға имбарго йүргүзүш қәдими тезлишиватқан бир вәзийәттә, японийәму буниң японийә карханилириға көрситидиған тәсирини ойлишишқа башлиған. Чүнки японийә карханилириму хитайниң уйғурларни қул қилиш мәсилисигә четишлиқ завутлирини тәкшүрүш мәсилисигә дуч кәлгән.

Хәвәрдә көрситилишичә, австралийә истратегийәлик сиясәт тәтқиқат мәркизи бу йил 3-айда елан қилған доклатта уйғурларни қул ишчи қилиш мәсилисигә четилидиған 82 даңлиқ марка көрситилгән болуп, 80 миң уйғурниң хитайниң һәр қайси өлкилиридики 30 завутта мәҗбурий ишлитиливатқанлиқи мәлум қилинғаниди. 82 Даңлиқ марка ширкәтлири ичидә 11 японийә ширкити уйғурларни қул ишчи орнида ишлитидиған хитай завутлириға тайинидикән. Булардин юникло (Uniqlo), шарп (Sharp), нинтендо (Nintendo) қатарлиқ ширкәтләр уйғурларни қул ишчи қилған завутлар билән алақиси йоқлуқини билдүргән.

Хәвәрдә ейтилишичә, японийә һөкүмити хитайда тиҗарәт қиливатқан японийә ширкәтлириниң мәҗбурий әмгәккә четишлиқ яки әмәслики тоғрилиқ соралған соалларға җаваб берип келиватқан болуп, бу ишлар японийә һөкүмитиниң ташқий сода сияситигә һәмдә японийә ширкәтлири уйғур районида тиҗарәт қилса боламду-йоқ дегән мәсилигә четилидикән. Нөвәттә японийәдиму японийә нусхисидики "магнетиский қануни" ни түзүш күнтәртипкә киргән болуп, японийә парламенти хитай ишлири гурупписидики өктичи партийәгә мәнсуп парламент әзалири парламентқа бу қанун лайиһәсини сунушни музакирә қиливетипту. Һалбуки, японийәниң нөвәттики қанун системиси кишилик һоқуққа четилидиған иқтисадий җаза қанунлирини түзүшкә қийинлиқ туғдуридикән. японийә һөкүмити адәттә бирләшкән дөләтләр тәшкилати қарар чиқарған әһвалда униңға бойсунуш үчүн башқа дөләттики пулдарларниң японийәдики мелини тоңлитип қоялайдикән яки һоқуқдарлирини японийәгә киргүзмәйдикән.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт