Amérikaning Uyghurlarning kishilik hoquqini depsende qilishqa chétishliq karxanilarni jazalishi yaponiye karxanilirighimu tesir körsitidiken

Muxbirimiz jewlan
2020-11-12
Share

"Yaponiye asiya obzuri" torining 12-noyabir xewer qilishiche, xitayning Uyghurlarning kishilik hoquqini éghir depsende qilishi köplep eyibliniwatqan hemde amérika we gherb ellirining Uyghur mesilisige chétishliq karxanilargha imbargo yürgüzüsh qedimi tézlishiwatqan bir weziyette, yaponiyemu buning yaponiye karxanilirigha körsitidighan tesirini oylishishqa bashlighan. Chünki yaponiye karxanilirimu xitayning Uyghurlarni qul qilish mesilisige chétishliq zawutlirini tekshürüsh mesilisige duch kelgen.

Xewerde körsitilishiche, awstraliye istratégiyelik siyaset tetqiqat merkizi bu yil 3-ayda élan qilghan doklatta Uyghurlarni qul ishchi qilish mesilisige chétilidighan 82 dangliq marka körsitilgen bolup, 80 ming Uyghurning xitayning her qaysi ölkiliridiki 30 zawutta mejburiy ishlitiliwatqanliqi melum qilin'ghanidi. 82 Dangliq marka shirketliri ichide 11 yaponiye shirkiti Uyghurlarni qul ishchi ornida ishlitidighan xitay zawutlirigha tayinidiken. Bulardin yuniklo (Uniqlo), sharp (Sharp), ninténdo (Nintendo) qatarliq shirketler Uyghurlarni qul ishchi qilghan zawutlar bilen alaqisi yoqluqini bildürgen.

Xewerde éytilishiche, yaponiye hökümiti xitayda tijaret qiliwatqan yaponiye shirketlirining mejburiy emgekke chétishliq yaki emesliki toghriliq soralghan so'allargha jawab bérip kéliwatqan bolup, bu ishlar yaponiye hökümitining tashqiy soda siyasitige hemde yaponiye shirketliri Uyghur rayonida tijaret qilsa bolamdu-yoq dégen mesilige chétilidiken. Nöwette yaponiyedimu yaponiye nusxisidiki "Magnétiskiy qanuni" ni tüzüsh küntertipke kirgen bolup, yaponiye parlaménti xitay ishliri guruppisidiki öktichi partiyege mensup parlamént ezaliri parlaméntqa bu qanun layihesini sunushni muzakire qiliwétiptu. Halbuki, yaponiyening nöwettiki qanun sistémisi kishilik hoquqqa chétilidighan iqtisadiy jaza qanunlirini tüzüshke qiyinliq tughduridiken. Yaponiye hökümiti adette birleshken döletler teshkilati qarar chiqarghan ehwalda uninggha boysunush üchün bashqa dölettiki puldarlarning yaponiyediki mélini tonglitip qoyalaydiken yaki hoquqdarlirini yaponiyege kirgüzmeydiken.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet