Amérikaning Uyghur mejburiy emgiki sewebidin yene 29 xitay shirkitini jazalishi xitayni qattiq bi'aram qilghan

Amérika ana weten xewpsizliki ministirliqining ötken hepte “Uyghur mejburiy emgikining aldini élish qanuni” gha asasen, yene 29 xitay shirkitini qara tizimlikke élishi, iqtisadiy kasatchiliqtin qutulush yoli izdewatqan xitay hökümitining qattiq naraziliqini qozghighan.

Bu jaza yéqinda iqtisadni kasatchiliqtin qutquzushning bir qatar tedbirlirini yolgha qoyghan xitayning, iqtisadni eslige keltürüshini téximu qiyinlashturidighanliqi qeyt qilinmaqta. Melum bolushiche, amérika ana weten xewpsizliki 22-noyabir “Shinjang renglik mitallorgiye guruhi” ni öz ichige alghan 29 shirketni qara tizimlikke kirgüzgendin kéyin, xitay diplomatik qanalliri arqiliq amérikagha resmiy naraziliq bildürgen. Xitayning xelq'ara teshwiqat qanili bolghan CGTN ning 27-noyabir bergen xewiride bildürüshiche, xitay seyshenbe küni amérikagha qattiq diplomatik naraziliq bildürgenlikini éytqan.

Xitay soda ministirliqining bayanatchisi “Amérikaning héchqandaq pakit asasi bolmighan bu herikiti, kishilik hoquqni qoghdash namida élip barghan tipik iqtisadiy zomigerlik” dep eyibligen. Halbuki, amérikadiki “Kommunizm qurbanliri xatire fondi” ning aliy tetqiqatchisi adriyan zénzning ötken hepte X ta élan qilghan uchurida qeyt qilishiche, nöwette Uyghur élide xitayning dölet hamiyliqidiki “Yötkep ishqa orunlashturush arqiliq namratliqtin qutquzush pirogrammisi” üzlüksiz kéngiyip, rayondiki “Asasliq mejburiy emgek sistémisigha aylan'ghan.”

Halbuki, CGTN ning xewiride, xitay soda ministirliqi bayanatchisining “Shinjang Uyghur aptonom rayonida mejburiy emgek deydighan bir nerse yoq” dégenliki qeyt qilinmaqta. Xitay soda soda ministirliqining bayanatchisi, xitayning buninggha qarshi zörür tedbirlerni qollinip, “Xitay shirketlirining qanunluq hoquqi we menpe'etini qoghdaydighanliqi” ni bildürgen bolsimu, emma u xitayning qandaq “Zörür tedbirler” ni qollinidighanliqini chüshendürmigen.

Amérikaning yene 29 xitay shirkitini qara tizimlikke élishi, yawropa ittipaqining 19-noyabir küni “Mejburiy emgek mehsulatlirining yawropa bazirigha kirishini cheklesh qanuni” ni maqullishining arqisidinla élan qilin'ghan idi.