Хитай шеркәтлирини америка перевот базиридин чәкләшкә аит қанун лайиһәси авам палатасидин өтти

Мухбиримиз ирадә
2020-12-03
Share

Америка авам палатаси 2-декабир чаршәнбә күни хитай ширкәтлирини америка перевот базиридин чәкләшкә мунасивәтлик бир қанун лайиһәсини мақуллиди. Бу қанун лайиһәси хитайниң "алибаба" гуруһи, "NIO" вә башқа ширкәтлириниң пай чәклирини америка перевот базирида базарға селишиға тәһдит пәйда қилидикән.

Мәзкур қанун лайиһәси бу йил 5-айда америка кеңәш палатасидики һәр икки партийә әзалириниң қоллиши билән мақуллуқтин өткән болуп, ахирқи һесабта президент трампниң қол қоюши билән тезла қанунға айлиниду, дәп қаралмақта.

"вал-ситрит жорнили" ниң бу һәқтики хәвиридин қариғанда, хитай һөкүмити өз ширкәтлириниң чәт әлләрдә иқтисадий тәптишликтин өткүзүлүшигә қарши туруп кәлгән болуп, бу күрәш трамп һөкүмити мәзгилидә юқири басқучқа йәткән. Қанун ишқа киришкән тәқдирдә, хитай ширкәтлири вә уларниң мупәттишлири үч йил бойичә американиң тәкшүрүшини қобул қилиши керәккән. Әгәр бөсүш һасил қилиш мумкинчилики йоқ болса, у һалда бу хитай ширкәтлири америка перевот базиридин чәклинидикән.

Хәвәрдә мундақ дийилгән: "хитай ширкәтлири көп йиллардин буян америка пайчиклиридин пул топлиди, әмма уларниң мупәттишлири мәбләғ салғучиларниң әң асасий қоғдилиш һоқуқлириға хилаплиқ қилди, мәсилән, хитай адәттә америка назарәт қилип башқуруш органлириниң уларни тәкшүрүшигә йол қоймиди. Бирақ, хитайниң ‹луккин қәһвә ширкити' қатарлиқ бир қатар хитай ширкәтлириниң өткән он йилда боғалтирлиқ сәтчиликигә петиши америка пай базирида пул топлаватқан хитай шеркәтлирини тәкшүрүш һәқққидики тонушни өстүрди."

Мәлум болушичә, хитай ширкәтлирини америка пай базиридин қоғлап чиқириш мәбләғниң зор дәриҗидә йөткилишини кәлтүрүп чиқиридикән вә наһайити тезла тәрәққий қилған хитай ширкәтлири ню-йоркқа йиғиливелип, хәлқараға йүзлинидиған дәврни ахирлаштуридикән. Хитайниң һазир хитай ичи вә хоңкоңни база қилған 250 дин артуқ ширкити америка перевот базирида базарға селинған болуп, уларниң җәмий базар қиммити 2 тирилйон доллардин ашидикән.

"вал-ситрит жорнили" гезитиниң хәвиридә бу қанун вашингитонни бейҗиң билән болған иқтисадий сөһбәтләрдә үстүнлүккә игә қилиду, дәп баһалиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт