Xitay shérketlirini amérika péréwot baziridin chekleshke a'it qanun layihesi awam palatasidin ötti

Muxbirimiz irade
2020-12-03
Share

Amérika awam palatasi 2-dékabir charshenbe küni xitay shirketlirini amérika péréwot baziridin chekleshke munasiwetlik bir qanun layihesini maqullidi. Bu qanun layihesi xitayning "Alibaba" guruhi, "NIO" we bashqa shirketlirining pay cheklirini amérika péréwot bazirida bazargha sélishigha tehdit peyda qilidiken.

Mezkur qanun layihesi bu yil 5-ayda amérika kéngesh palatasidiki her ikki partiye ezalirining qollishi bilen maqulluqtin ötken bolup, axirqi hésabta prézidént trampning qol qoyushi bilen tézla qanun'gha aylinidu, dep qaralmaqta.

"Wal-sitrit zhornili" ning bu heqtiki xewiridin qarighanda, xitay hökümiti öz shirketlirining chet ellerde iqtisadiy teptishliktin ötküzülüshige qarshi turup kelgen bolup, bu küresh tramp hökümiti mezgilide yuqiri basquchqa yetken. Qanun ishqa kirishken teqdirde, xitay shirketliri we ularning mupettishliri üch yil boyiche amérikaning tekshürüshini qobul qilishi kérekken. Eger bösüsh hasil qilish mumkinchiliki yoq bolsa, u halda bu xitay shirketliri amérika péréwot baziridin cheklinidiken.

Xewerde mundaq diyilgen: "Xitay shirketliri köp yillardin buyan amérika paychikliridin pul toplidi, emma ularning mupettishliri meblegh salghuchilarning eng asasiy qoghdilish hoquqlirigha xilapliq qildi, mesilen, xitay adette amérika nazaret qilip bashqurush organlirining ularni tekshürüshige yol qoymidi. Biraq, xitayning 'lukkin qehwe shirkiti' qatarliq bir qatar xitay shirketlirining ötken on yilda boghaltirliq setchilikige pétishi amérika pay bazirida pul toplawatqan xitay shérketlirini tekshürüsh heqqqidiki tonushni östürdi."

Melum bolushiche, xitay shirketlirini amérika pay baziridin qoghlap chiqirish mebleghning zor derijide yötkilishini keltürüp chiqiridiken we nahayiti tézla tereqqiy qilghan xitay shirketliri nyu-yorkqa yighiliwélip, xelq'aragha yüzlinidighan dewrni axirlashturidiken. Xitayning hazir xitay ichi we xongkongni baza qilghan 250 din artuq shirkiti amérika péréwot bazirida bazargha sélin'ghan bolup, ularning jem'iy bazar qimmiti 2 tirilyon dollardin ashidiken.

"Wal-sitrit zhornili" gézitining xewiride bu qanun washin'gitonni béyjing bilen bolghan iqtisadiy söhbetlerde üstünlükke ige qilidu, dep bahalighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet