Analizchilar: "Xitay hökümiti sheher-bazalarda ishqa orunlashturush kölimini kéngeytken, muhim nuqta yenila Uyghur rayoni"

Muxbirimiz jewlan
2021-05-17
Share

Xitayning sirtqa qarita teshwiq qilidighan "Xelq géziti" ning bir xewirige qarighanda, bu yil xitayda oqush püttürüp ish izdeydighan oqughuchilar 9 milyon 900 ming bolup, xitaydiki ishsizliqqa yéngi bésim élip kelgen. Buninggha qarita xitay hökümiti burunqi tedbiri asasida ottura we kichik tiptiki karxanilargha ishsizliq sughurtisi we bashqa toluqlima yardem bérish arqiliq bu karxanilarni ishqa orunlashturush nuqtilirigha aylandurmaqchi bolghan. Bu karxanilarning köpinchisi yéza-bazar we kichik sheherlerge jaylashqan bolup, yéngi emgek küchliri asasen yéza-bazarlargha tarqaqlashturulidiken.

Xitayning istatistikiliq melumatigha qarighanda, ötken 3 ayda Uyghur rayonidiki yéza-bazarlarda 2 milyon 970 adem ishqa orunlashqan bolup, bu yilliq nishanning 27 pirsenti orunlan'ghan. Xitayning korona wirusi mezgilide iqtisadni janlandurush üchün yolgha qoyghan "Testiq resmiyitini azaytish, resmiyet heqqi almasliq, qerz ösümini kéchiktürüsh, qerz ösümini chüshürüsh, meblegh yürüshtürüsh éhtiyajini kapaletlendürüsh" qatarliq besh tedbiri we buninggha ajratqan 1. 7 Tirilyon yüen puli, shundaqla 6 milyon 800 ming karxanigha chüshürüp bergen 104 milyard 200 milyon yüen ishsizliq sughurtisi puli xitay karxanilirining iqtisadini tirildürüp, ishqa orunlishish nisbitini yuqiri kötürgen.

Analizchilarning qarishiche, meblegh we sughurta yardimi alghan ottura we kichik tiptiki karxanilarning xéli köp qismi Uyghur rayonining her qaysi jayliridiki nahiye we bingtu'en meydanlirigha jaylashqan bolup, bu jaylardiki tebi'iy bayliq, xam eshya we yéza igilik mehsulatliri xitay karxaniliri üchün tépilghusiz purset yaratqan, shuning bilen birge xitay köchmenliri we ish izdep yürgen aliy mektep oqughuchiliri bu jaylargha kélip ishleshke qiziqturulghan. Uyghur rayoni hazir xitay karxaniliri eng köp étiwargha érishidighan we payda tapidighan rayon'gha aylan'ghan bolup, xitayning assimilatsiye siyasitini emelge ashurush üchün jelp qilin'ghan xitay aqqunliri we studéntlirining eng köngüldikidek ish tépish we yashash makanigha aylanmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet