D u q bayanatchisi dilshat rishit: “Jang chünshyenning chöchek, bortala chégra ziyariti weziyet ensirishining ipadisi”

Dunya Uyghur qurultiyi bayanatchisi dilshat rishit xitayning Uyghur diyarigha teyinligen partkom sékrétari jang chünshyenning 31-iyul we 1-awghusttiki chöchek, bortala chégra ziyaritining, ötken jüme küni Uyghur rayon da'iriliri “Térrorluqqa zerbe bérish qanunini yolgha qoyush charisi” ni élan qilghandin kéyinla élip bérilishining xitay hökümitining Uyghur weziyitidin ensirewatqanliqining ipadisi ikenlikini bildürdi.

Dilshat rishit 2-awghust radiyomiz ziyaritini qobul qilghinida bu heqte toxtilip, “Xitay emeldari jang chünshyen ikki kündin buyan ottura asiyadiki qazaqistan bilen chégrilinidighan chöchekning baqtu chégra éghizi we bortaladiki alataw chégra éghizida chégra saqlighuchi eskerler we qoralliq saqchilardin herqandaq shara'itta iradisi mustehkem halda dölet chégrasini qoghdap, rayon muqimliqini saqlashni telep qilghanliqi we chöchek shehiridiki ziyaritide milletler ittipaqliqini kücheytip, diniy radikalliqqa zerbe bérishni tekitligenliki melum boldi. Jang chünshyenning bu qétimqi ziyaritining 29-iyul Uyghur da'iriliri ‛térrorluqqa zerbe bérish qanunini yolgha qoyush charisi‚ ni élan qilghandin kéyinla élip bérilishi diqqet qozghaydu. Méningche bu qétimqi ziyaret xitay hökümitining Uyghur rayoni weziyitidin qattiq ensirewatqanliqining ipadisi” dédi.

Xitay xewerler torining 2-awghust küni “Shinjang géziti” din neqil élip xewer bérishiche, jang chünshyen chöchek we bortaladiki ikki künlük ziyaritide chégra qarawulliri, qoralliq saqchilardin we chöchektiki xitayning dölet bayriqini öz qorusida chiqirish bilen tonulghan milletler ittipaqliqi nemunichisi sadiqjan qatarliqlardin alahide hal sorighan.

Xewerde tilgha élinishiche, jang chünshyen 1962-yilidiki ili, chöchek xelqining eyni chaghda sabiq sowét ittipaqi tewelikidiki qazaqistan, qirghizistan qatarliqlargha qéchish weqesidin kéyin qurulghan xitay chégra mudapi'e eskerlirini ziyaret qilghinida ulardin “Chong shamalda tewrenmeslik, menpe'etke bérilmeslik, küchlük düshmenning hiylisige aldanmasliq” ni telep qilghan.