Xitay da'iriliri kommunistik yashlar ittipaqini islah qilidighanliqini élan qildi

Xitay da'iriliri kommunistik yashlar ittipaqigha qaritilghan bashqurushni kücheytidighanliqi we uni islah qilidighanliqini élan qildi.

Xitaydiki kommunistik yashlar ittipaqi xitay kommunistlirining kéyinki izbasarlirini teminleydighan muhim teshkilatlirining biri bolup, xitayning sabiq re'isliridin xu jintaw mezkur teshkilattin ösüp chiqqan.

Uningdin bashqa nöwette xitay hoquq sehnisidiki eng nopuzluq shexslerdin bash ministir li kéchyang, mu'awin re'is li yu'enchaw, xu jintawning sabiq meslihetchisi, yéqinda türmige tashlan'ghan ling jixu'a qatarliqlarmu yashlar ittipaqida hoquq tutqan shexsler iken.

Ling jixu'a bu yil iyulda dölet mexpiyetlikini ashkarilash we hoquqni qalaymiqan ishlitish jinayiti bilen muddetsiz qamaq jazasigha höküm qilin'ghan idi. Uningmu esli siyasiy hayatini shenshi ölkisidiki kommunistik yashlar ittipaqida wezipe öteshtin bashlighanliqi melum.

Shinxu'a axbaratning xewer qilishiche, xitay kommunistik partiyisi merkiziy komitéti seyshenbe küni “Kommunistik yashlar ittipaqini islah qilish pilani” ni élan qildi.

Pilanda, merkiziy ittipaq komitétining xadim we organ islahati qilinidighanliqi, kadir tallash, ishlitish we bashqurushni islah qilidighanliqi körsitilgen.

Xewerde yene yashlar ittipaq kadirlirining köpinche waqtini yashlar bilen ötküzüp, ularni “Choqum partiyening gépini anglashqa we partiyige egishish” ke righbetlendürüsh kérekliki körsitilgen.

Xitay kommunistik yashlar ittipaqi 1922- yili qurulghan bolup, uning ezalirining sani 2015-yilining axirighiche 87 milyon'gha yetken.

Shi jinping hakimiyet béshigha chiqqandin kéyin kommunistik yashlar ittipaqigha qaritilghan bashqurush bara-bara küchiyishke bashlighan.

Xitay merkiziy intizam tekshürüsh komitéti bu yil aprélda yashlar ittipaqining partiye bilen mas qedemde mangalmaywatqanliqini körsitip ularni eyibligen.