Хитай даирилири уйғур елида кәнтләр билән карханиларни бирләштүрүш һәркити башлиған

Мухбиримиз әркин
2021-12-10
Share

Хитай уйғурларни “намратлиқтин қутқузуш” намида кәң көләмлик мәҗбурий әмгәккә селиш билән әйиблиниватқан вә ишләпчиқарған мәһсулатлири имбаргоға учрашқа дуч кәлгән бир вақитта, уйғур елидики кәнтләр билән карханиларни бирләштүрүш һәркити башлиған. Хитай таратқулириниң ейтишичә, “түмән кархана түмән кәнтни гүлләндүрүш” дәп аталған бу һәрикәт аталмиш “намратлиқтин қутқузушта еришкән нәтиҗиләрни йеза-кәнтләрни гүлләндүрүш билән бағлашниң муһим тәдбири” икән.

Хитай һөкүмити 2017-йили башланған тутқун билән бир вақитта, уйғур йеза-кәнтлиригә нурғун хитай карханилирини йөткәп келип, “җайида ишқа орунлаштуруш” намида йеза-кәнтләрдә қәп қалған уйғур әмгәк күчлирини бу карханиларда “һәрбий түзүм” билән ишқа салған. “шинҗаң гезити” ниң хәвәр қилишичә, уйғур аптоном районлуқ даириләр 9-декабир ‍үрүмчидә йиғин өткүзүп, “түмән кархана түмән кәнтни гүлләндүрүш” һәркитини башлиған. Йиғинға уйғур аптоном районлуқ партком бирликсәп бөлүминиң башлиқи зумрәт обул қатнашқан һәм сөз қилған.

“шинҗаң гезити” ниң ейтишичә, 2016-йилдин бери 1747 хусусий кархана райондики 2157 кәнт, 420 миң аһалиниң аталмиш “намратлиқтин қутулуши” ға ярдәм бәргән. Хитай даирилириниң бу һәрикәтни америка авам палатаси мутләқ көп аваз билән “уйғур мәҗбури әмгикиниң алдини елиш қанун лайиһәси” мақуллап, уйғур елида ишләпчиқирилған мәҗбури әмгәк мәһсулатлириниң америкаға импорт қилинишини чәкләшкә киришкән бир вақитта башлиши, диққәт қозғимақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт