Xitay tashqi sodini güllendürüsh üchün Uyghur rayonida yük mashiniliri tiransport merkizi qurghan

Washin'gtondin muxbirimiz jewlan teyyarlidi
2024.05.28

Uyghur rayoni nöwette xitayning “Bir belwagh bir yol” sodisining muhim qatnash tügünige aylan'ghan bolup, bu sewebtin xitay hökümitining mezkur rayonning tömür yol, tashyol we ayrodurum qurulushigha ghayet zor meblegh sélip kéliwatqanliqi melum.

“Bastil pochtisi” (Bastille Post) gézitining 27-may künidiki xewiride éytilishiche, xitay hökümitining Uyghur rayonidiki yük mashiniliri tiransport merkizi 5-ayning 26-küni resmiy qurulghan. Bu, xitayning xelq'ara tashyol tiransport birleshmisi (IRU) ning ijazitige érishken tunji yük toshush merkizi hésablinidiken.

Bu yük toshush merkizi qeshqer erkin soda sinaq rayonigha qurulghan bolup, bu merkez arqiliq qeshqerdin ottura asiya we yawropa döletlirige mal toshush miqdarining 30 pirsent ashidighanliqi, mal toshush tennerxining 15 pirsent töwenleydighanliqi mölcherlen'gen.

Xelq'ara tashyol tiransporti (IRT) xelq'ara tamozhna sistémisi bolup, yük toshughuchilar bilen yük ötküzidighan döletler tamozhnasi otturisidiki resmiyetni qisqartip, pul we waqitni téjesh rolini oynaydiken. Xitay xelq'ara soda yolidiki tosalghularni azaytish üchün, 2016-yil 7-ayda “Xelq'ara tashyol yük toshush kélishimi” ge qol qoyghaniken.

Melum bolushiche, “Uyghur mejburiy emgikining aldini élish qanuni” resmiy yolgha qoyulghandin buyanqi bir yil ichide qara tizimlikke élin'ghan xitay shirketlirining sani 24 ke yetken؛ tutup qélin'ghan malning omumiy qimmiti 1 milyard 300 milyon dollardin ashqan. Bundaq ehwalda xitay shirketliri tashqi sodisini ottura asiya, jenubiy asiya we yawropagha kéngeytiwatqan bolup, qeshqerde qurulghan tashyol yük tiransport merkizi buning bir misali dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.