خىتاي تاشقى پېرېۋوت زاپىسى ئۆتكەن ئايدا 100 مىليارد دوللاردەك تۆۋەنلىگەن

ئۆتكەن ھەپتە ئاخىرى خىتاي خەلق بانكىسى خىتاي تاشقى پېرېۋوت زاپىسىنىڭ يەنە 99 مىليارد 500 مىليون دوللار تۆۋەنلەپ، 3.23 تىرىليون دوللارغا چۈشۈپ قالغانلىقىنى جاكارلىدى.

ب ب س نىڭ بۇ ھەقتىكى خەۋىرىگە قارىغاندا، خىتاي تاشقى پېرېۋوت زاپىسىدىكى تۆۋەنلەش پەقەت ئالدىنقى 6 ئاي ئىچىدىلا 420 مىليارد دوللارغا يەتكەن.

«بلۇمبېرگ» تورىنىڭ خەۋەر قىلىشىچە، خىتاينىڭ تاشقى پېرېۋوت زاپىسى 2014 - يىلى ئىيۇننىڭ ئاخىرى 3.99 تىرىليون دوللارغا يەتكەن ئىكەن. بۇ ئۇنىڭ ئەڭ يۇقىرى چەككە يېتىشى بولۇپ، مەزكۇر سومما 2015 - يىلى دېكابىردا 3.33 تىرىليون دوللارغا چۈشۈپ قالغان ئىدى.

«ئىقتىساد ۋاقىت گېزىتى» نىڭ مەلۇماتلىرىغا قارىغاندا، خىتاينىڭ تاشقى پېرېۋوت زاپىسى 2014- يىلى يۇقىرى چەككە يەتكەن ۋاقتىدىن بۇ يىل يانۋارغا كەلگۈچە 1 تىرىليون دوللارغا يېقىن تۆۋەنلىگەن.

مۇلاھىزىلەردە خىتاي تاشقى پېرېۋوت زاپىسىنىڭ تۆۋەنلىشى خىتاي خەلق پۇلىنىڭ كۇرسىغا بىۋاسىتە باغلانغان.

خىتاي ئۆتكەن يىلى ئاۋغۇستتا ئۆز پۇلىنىڭ ئالماشتۇرۇش قىممىتىنى تەڭشىگەندىن كېيىن، خەلق پۇلىنىڭ كۇرسى بىراقلا 3 پىرسەنت چۈشۈپ كەتكەن ئىدى.

ب ب س دا نەقىل قىلىشىچە، بۇ ھەقتە توختالغان IHSپۇل-مۇئامىلە بازىرى تەتقىقات گۇرۇھىدىكى ئالىي ئىقتىسادشۇناس راۋىج بىسۋاس تاشقى پېرېۋوت زاپىسىدا كۆرۈلگەن بۇنداق جىددىي تۆۋەنلەشكە يەنە بەرداشلىق بېرىش خىتايغا نىسبەتەن ئېيتقاندا قېيىن ئىكەنلىكىنى بىلدۈرگەن.