Sabiq prézidént obamaning dölet xewpsizlik meslihetchisi: "Xitay amérika üchün eng jiddiy tehdit"

Muxbirimiz erkin
2020-01-14
Élxet
Pikir
Share
Print

Sabiq amérika prézidénti obamaning dölet xewpsizlik meslihetchisi jéymis jonés xitayning amérika üchün "Eng jiddiy tehdit" ikenlikini bildürgen.

Jéymis jonésning ilgiri sürüshiche, xitayning öz pilanigha bolghan chüshenchisi "Nahayiti éniq" bolup, amérika buninggha "Nahayiti jiddiy" qarishi kérek iken. Jéymiz jonés bu sözlerni 12‏-yanwar küni atlantik kéngishining ebu zebide ötküzülgen "Yershari énérgiye munbiri" yighinida tekitligen. U, xitayning pilanlirining birining "Téxnologiye arqiliq öz puqralirini omumyüzlük kontrol qilish" ikenlikini, uning bu jehette heyran qalarliq ilgirileshlerge érishkenlikini bildürgen. Jéymis jonésning qeyt qilishiche, xitay hökümiti ijtima'iy krédit sistémisi arqiliq puqralirigha nomur qoyup, ularning xizmiti, yötkilishi we herqandaq herikitini kontrolluq astigha alghan. U, xitayning bu herikitining qorqunchluq ikenliki, uning bu usulni bashqa döletlerge éksport qilmaqchi boluwatqanliqini tekitligen.

Uning qarishiche, xitay yene "Trowa éti" istratégiyesini ishlitip, dunyaning nurghun jaylirida öz tesirini tiklimekte iken. Jéymis jonés "Ular iqtisadqa singip kirip, sétiwalalaydighan herqandaq nersini sétiwalmaqta. Buning üchün her xil bedellerni ötimekte. . . .  Bu arqiliq iqtisadning gélidin boghup, andin özining teleplirini qobul qildurmaqta" dégen. Uning tekitlishiche, amérikaning tedbir qollinip, buninggha taqabil turushi kérek iken.

Jéymis jonésning bu sözlerni amérika-xitay 1‏-basquchluq soda kélishimi imzalinishning aldida qilishi diqqet qozghidi. Amérika-xitay 1-basquchluq soda kélishimi 15‏-yanwar aq sarayda imzalinidu. Nöwette, xitayning mu'awin bash ministiri lyu xé washin'gton'gha yétip kelgen. Mutexessisler, nöwette amérika-xitay soda urushi bir az peseygendek qilsimu, lékin halqiliq ixtilaplarning hel bolmighanliqini bildürmekte. Amérika soda wekili laytézérning qeyt qilishiche, nöwette xitayning dölet kapitaligha qoshumche yardem bérish arqiliq dunyaning her qaysi jaylirida keng kölemlik shirket sétiwélishtek "Esebiylerche herikiti" "Nahayiti zor xiris" peyda qilmaqtiken.

Toluq bet