Amérika kéngesh palata istixbarat komitéti xitayning amérika dölet bixeterlikige zor tehditlikini tekitligen

Muxbirimiz irade
2021-08-05
Share

Amérika kéngesh palatasining istixbarat komitéti 4-awghust küni bir ochuq ispat anglash yighini échip, xitayning amérikaning dölet bixeterlikige élip kéliwatqan tehditining künséri küchiyiwatqanliqini tekitligen.

"Dölet mejlisi" namliq zhurnalning xewer qilishiche, dölet mejlis ezaliri sözide xitayning amérika shirketliri we halqiliq organlargha qaritiwatqan tor hujumliri, amérikaning bilim mülük hoquqi saheside qiliwatqan oghriliqi qatarliq nurghun mesililerde alahide toxtalghan.

Kéngesh palatasi istixbarat komitétining re'isi mark warnér bolsa sözide amérika jama'itining bu tehdittin xewiri bolushi kéreklikini tekitlep "Adette istixbarat komitéti ochuq ispat anglash yighini achmaydu, emma mu'awin re'isimiz marko rubiyo we men boluwatqanlardin amérika jama'itining xewiri bolushi kérek dep qaraymiz" dégen.

Marko rubi'o bolsa xitayning her sahede amérikani ajizlashturush urunushigha sel qarashqa bolmaydighanliqini, bolupmu téxnika saheside xitaygha taqabil turulushi kéreklikini, xitayning alliqachan bir tehdit bolup shekillinip bolghanliqini eskertken.

Yighinda yene, amérika döletlik jasusluqqa qarshi turush we bixeterlik merkizi (NCSC) ning sabiq mudiri, we éwanina guruppisining qurghuchisi we bash ijra'iye emeldari wilyam éwaninamu guwahliq bergen bolup, u sözide peqet 2020-yilila xitayning 300 milyard dollardin 600 milyard dollarghiche bilim mülk hoquqi we soda mexpiyetliki oghrilighanliqini éytqan we "Bügünki téma. . . Mewjutluq tehditi, u dölitimiz duch kelgen eng murekkep, eng ziyanliq, eng mutihemlerche istratégiyelik tehdittur" dep süpetligen.

Kéngesh palata ezaliri yighinda amérikaning choqum derhal we muwapiq tedbir qollinishi, bolupmu téxnika we mudapi'ede keskin tedbirlerni qollinip xewpke taqabil turushi kéreklikini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet