Xitay hökümiti Uyghurlar mesilisi heqqide isra'iliyege bésim qilghan

“Aksyos” (Axios) torining yéqinda ehwal igilishi jeryanida xitay hökümitining Uyghurlar mesilisi tüpeylidin resmiy halda isra'iliyeni “Agahlandurmaqchi” bolghanliqi melum bolghan.

Xewerde éytilishiche, xitay kompartiyesi merkiziy komitéti tashqi alaqe bölümining bashliqi lyu jyenchaw yéqinda isra'iliyening béyjingdiki bash elchisi irit bén abba (Irit Ben-Abba) gha amérika bilen bolghan munasiwette “Amérika hökümitining bésimini dep özlirining béyjing bilen bolghan munasiwitini buzup qoymasliq” ni agahlandurghan. Shuningdek özliriningmu “Isra'iliyediki yehudiylargha oxshashla gherb jahan'girlikining ziyankeshlikige uchrighan xelq ikenliki” ni eskertken. U bu heqtiki sözide “Isra'iliye hazir biz bilen qandaq munasiwette bolushini belgileydighan achquchluq nuqtida turmaqta” dégen.

Xewerde éytilishiche, lyu jyenchaw isra'iliye hökümitining birleshken döletler teshkilati (b d t) da “Uyghurlar qirghinchiliqqa uchrawatidu” dégen mesilide amérika bilen bir septe turghanliqini eyibligen. Shundaqla ularni “Amérika bashlighan patqaqqa patmasliq” qa dewet qilghan. U bu heqte qilghan sözide “Amérika hazirghiche afghanistan we iraqta urush qozghighan bolsimu hökümitimiz ötken 40 yilda bir paymu oq chiqarghini yoq” dégen. Emma isra'iliye bash elchisi “Bizning öz aldigha musteqil diplomatiye siyasitimiz bar” dégen hemde nöwettiki meydanini özgertmeydighanliqini bildürgen.

Melum bolushiche, isra'iliye hökümiti sabiq bash ministir bényamin nétaniyaxu (Benjamin Netanyahu) dewride xitay bilen bekla yéqin munasiwette bolghan bolup, yéngi hökümet dewride bu hal tüptin özgergen. Bolupmu xitay hökümiti islam dunyasining qollishini qolgha keltürüsh üchün amérikaning eng yéqin ittipaqdashlirining biri bolghan isra'iliye bilen tirkiship kéliwatqan pelestin dölitining isra'iliyege qarshi pa'aliyetlirini qollashni dawam qildurghanliqtin isra'iliyediki xitaygha qarshi keypiyat barghanséri yuqiri kötürülmektiken.