Xitayning amérika üchün “Eng chong tehdit” ikenliki barghanséri aydinglashmaqta

“Foks xewerliri” ning 17-dékabirdiki xewiride éytilishiche, amérika dölet mejlisidiki “Amérika-xitay istratégiyelik riqabet pewqul'adde komitéti” ning ezaliridin karlos giménéz (Carlos Gimenez) xitayni amérika üchün “Eng chong tehdit” dep körsetken. Shundaqla wezipige olturush aldidiki pirézidént donald trampning “Madarachiliq bilen emes, belki küch bilen tinchliqni emelge ashuridighanliqi” ni eskertken.

Awam palata ezasi karlosning qarishiche, xitay hazir tor hujumidila emes, téximu muhimi herbiy we iqtisadiy jehettinmu amérika üchün “Eng chong düshmen” bolup qalghan. Bolupmu xitayning dunyadiki eng chong ishlepchiqirish bazisi ikenliki, amérika tewesidiki dölet mudapi'e we herbiy teyyarliq eshyalirining ishlepchiqirilishi kölem jehette xitaygha yetmeydighanliqi, nawada ikki terep uzun'gha sozulghan urushqa kirip qalsa weziyetning amérika üchün xeterlik bolup qalidighanliqi buningdiki eng muhim amillar hésablinidiken. U mushu ehwallarni sanap kélip, “Rusiye-ukra'ina urushi bizning dölet mudapi'e eshyalirini ishlepchiqirish qabiliyitimizning jiq töwenlep ketkenlikini körsetti” dégen.

Giménézning qarishiche, yéngi hökümet del mushu ajizliqni tügitishke zéhin qoyidighan bolup, buning üchün köpligen xususiy shirketlerning bu sahege qatnishishi, shuningdek amérika hökümet sistémisidiki byukratliqni tügitish zörür qedemler hésablinidiken. Yene kélip amérika siyasiy sahesi amérika üchün kimning düshmen, kimning dost ikenlikini, shuningdek özining qandaq ajizliqi barliqini bilishmu muhim iken. U bu heqte söz bolghanda, “Yillardin buyan xitay bizni jiq oynitip ketti” dégen.

Uning qarishiche, bu jehettiki xushallinarliq yüzlinishning biri, “Amérika-xitay istratégiyelik riqabet pewqul'adde komitéti” ikki partiye ezaliridin teshkil tapqan bolsimu, “Xitay tehditi” mesiliside ularning pikri birdek iken. Ular izchil “Xitay biz üchün tehdit bolup kelgen, bundin kéyinmu tehdit bolidu” dep qaraydiken.