Хю хювит: “америка демократийәсигә һәқиқий тәһдит хитайдур!”

Мухбиримиз әзиз
2021-12-28
Share

Америка җамаитигә яхши тонушлуқ болған телевизийә риясәтчиси вә мәшһур сиясий анализчи хю хювит (Hugh Hewitt) нөвәттики америка демократийәсигә һәқиқий мәнидә тәһдит пәйда қиливатқан зулмәтниң хитайдин келиватқанлиқини алаһидә тәкитләп “америка хәлқи хитайдин ибарәт бу һәқиқий тәһдиткә қарши бир яқидин баш чиқириши лазим” дәп көрсәтти.

“вашингтон почтиси” гезитиниң 27-декабир санида елан қилинған бу һәқтики обзор мақалисидә хуй хювит нөвәттә хитайниң ялғуз тәһдитла әмәс, йәнә зор хәтәрниңму бешарити икәнликини тәпсилий шәрһлиди. У байден һөкүмитиниң дөләт бихәтәрлики чүшәнчисидә һелиһәм бир қатар кәмтүклүкниң мәвҗутлуқини, болупму вийетнам уруши мәзгилидики тәпәккур басқучида тохтап қалған бирқисим кишиләрниң ‍изчил килимат мәсилисидә яки қанун арқилиқ идарә қилиш мәсилисидә пирқирап йүргәнликини тәнқидләп “һазир биз үчүн әң зор тәһдит хитайдур. Болупму рәһимсизликтә тәңдиши тепилмас ши җинпиң башлап меңиватқан хитай компартийәси һазир техника, һәрбий ишлар вә иқтисадий амил нуқтисидин елип ейтқанда әйни вақиттики совет иттипақи һалак болуш һарписидики сәвийәгә йеқинлап қалди” дәйду.

Апторниң қаришичә, америка һөкүмити өтмүштә совет иттипақини әң зор тәһдит дәп қарап кәлгән. Буниң билән 40 йиллиқ “соғуқ уруш” давам қилған. Әмма өткән 25 йилда америка изчил һалда хитайниң баш көтүрүшини диққәттин сақит қилип кәлгән болуп, уларниң бу һәқтики чүшәнчисидә барлиққа кәлгән зор өзгириш хоңкоңдики демократийә намайишини бастуруш, уйғурларни қирғин қилиш, ғәрәзлик һалда вирусниң “қечип кетиши” гә йол қоюш, шуниңдәк тәйвән боғузида һәрбий иғвагәрлик қилиш қатарлиқ ишлардин кейин андин башланған. Техиму муһими америка һөкүмити бихудлуқ қилған һәмдә бар диққитини ислам ашқунлуқиға атап һалидин кәткән бу 25 йилда хитай һөкүмити русийә вә иран билән мустәһкәм достлуқ мунасивити орнитип болған.

Аптор мушу әһвалларни омумлаштуруп “әмди биз әвладлиримизға бундақ еғир йүкни қалдуруп кәтсәк болмайду. Буниң үчүн пикир җәһәттики ихтилапни бир яққа қайрип қоюп туруп пүткүл америка хәлқи бу ортақ тәһдиткә қарши иттипақлиқ орнитиши лазим” дәйду. Шуниң билән биргә америка һөкүмитиниң дөләт хам чот һесабиниң тездин хитайға қарши мудапиә көрүш саһәсигә мәркәзлишиши лазимлиқини тәкитләйду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт