Xitay hökümiti tekshürüsh ömiki Uyghur rayonidiki siyasetlerdin razi bolmighan we bésimni dawamliq kücheytishni telep qilghan

Muxbirimiz jewlan
2021-02-10
Share

Xitayche "Shinjang géziti" ning 9-féwral chiqarghan xewirige qarighanda, yéqinda xitay merkiziy komitét 6-qétimliq tekshürüsh guruppisi bashliqi wang rungjün Uyghur aptonom rayonluq partkom emeldarliri bilen körüshüp, tekshürüsh xizmitide bayqalghan mesililerni otturigha qoyghan. Bu mesililer asasliqi shi jinpingning yéngi dewr sotsiyalizm idiyesi, bolupmu "Shinjang xizmiti yighini" rohini omumyüzlük izchillashturalmasliq, "Shinjangni tertipke sélish we tüzesh" iqtidari yéterlik bolmasliq, "Jungxu'a milliti ortaq éngi qurulushi" ni puxta élip baralmasliq, "Yuqiri süpetlik tereqqiyat" ni yéterlik ilgiri sürelmeslik qatarliqlar iken.

Tekshürüsh guruppisi bashliqi wang rungjün ulardin shi jinpingning yéngi dewr sotsiyalizm idiyesini yétekchi qilip, 3 qétimliq "Shinjang xizmiti" yighini rohini izchillashturushni, siyasiy hushyarliq we weziyetke höküm qilish iqtidarini östürüp, ijra'at küchini ashurushni, jungxu'a milletliri ortaq éngini kücheytip, jaylarni tertipke sélish we tüzesh salmiqini ashurup, bu rayonning uzaq muddetlik muqimliqigha kapaletlik qilishni telep qilghan.

Chén chüen'go qatarliq xitay emeldarliri mezkur tekshürüsh guruppisi bayqighan mesililerning emeliyet, otturigha qoyghan teleplerning toghra ikenlikini bildürgen hemde merkezning ümidini aqlash üchün pütün sep boyiche küresh qilidighanliqini bildürgen.

Analizchilarning qarishiche, xitayning bu tekshürüsh guruppisining meqsiti Uyghur rayonidiki basturush siyasitini téximu kücheytish, zulum we jinayetni dawamlashturushqa yéshil chiragh yéqip bérish. Xitayning axirqi nishani shi jinping idiyesini barliq étiqadning ornigha dessitish, "Jungxu'a milletliri ortaq éngi qurulushi" arqiliq xitay milletchilikini bimalal yolgha qoyup, bashqa milletlerni assimilyatsiye qilish iken. Buning ichide, Uyghurlar yenila birinchi hujum nishani bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet