Xitay hökümiti teminlesh zenjirining muqimliqini qoghdap, iqtisadi tereqqiyatini ilgiri sürmekchi bolghan
2023.12.01
“Xelq tori” ning 2023-yili 11-ayning 30-kündiki xewirige asaslan'ghanda, 11-ayning 28 küni béyjingda tunji nöwetlik “Xitay xelq'ara teminlesh zenjirini ilgiri sürüsh körgezmisining échilish murasimi we dunya teminlesh zenjiride yéngiliq yaritish tereqqiyat yighini” échilghan.
Xitay bash ministiri li chyang bu yighinda söz qilip, yuqiri ünümlük kesip zenjiri, teminat zenjirini teng berpa qilish, “Bir belbagh, bir yol” qurulushi hemkarliqini dawamliq algha siljitish, her döletning öz aldigha soda ayrimichiliqi qilish we xelq'ara mal teminlesh zenjirige buzghunchiliq qilishigha qarshi turush kéreklikini tekitligen.
Bu yighinning échilish murasimigha hindonéziye bilen urugwayning dölet bashliqliri, dunya soda teshkilati, birleshken döletler teshkilati soda we tereqqiyat kéngishining katipliri qatniship widiyoluq söz qilghan.
Xitayning xelq'ara mal teminlesh liniyesi Uyghur mejburiy emgiki bilen zich baghlinishliq bolup, amérika bashchiliqidiki gherb döletliri xitay mallirigha bolghan béqindiliqni azaytish arqiliq mejburiy emgek mallirini import qilishtin saqlinishqa tiriship kéliwatqanidi. “Aqsaray tori” ning 11-ayning 27-kündiki mexsus xewirige qarighanda, amérika pirézidénti jow baydin shu küni aqsarayning yéngi teminlesh zenjirini yaxshilash we mal bahasini töwenlitish üchün kéngesh yighini chaqirghan. Baydin yene “Hindi-tinch okyandiki 13 dölet” bilen yéngi kélishim tüzgen bolup, bu kélishim arqiliq teminlesh zenjiridiki tosalghularni hel qilishni meqset qilidiken.
Jow baydinning teminlesh zenjirini yaxshilash we mal bahasini töwenlitish üchün kéngesh chaqirghandin kéyinla béyjingda tunji nöwetlik xitay xelq'ara teminlesh zenjirini ilgiri sürüsh munbirining échilishi her sahe kishilirining diqqitini qozghighanliqi bilinmekte.