Xitay tajikistanning pamir rayonining "Xitay zémini" ikenlikini we uning xitaygha "Qayturulup bérilishi" ni tekitligen

Muxbirimiz erkin
2020-08-03
Élxet
Pikir
Share
Print

Xitay tajikistanning pamir rayonining xitay zémini ikenliki we uning xitaygha qayturulup bérilishi kéreklikini tekitligen.

Amérikadiki "Jéymistawn fondi" ning torida élan qilin'ghan bir maqalide ashkarilishiche, yéqindin béri xitay hökümet taratqulirida xitay tarixchisi cho yawluning pamir rayoni heqqidiki bir qanche maqalisi élan qilin'ghan. Uningda tajikistannining pamir rayonining xitay zémini ikenliki, tajikistanning hazir yaki kelgüside bu zéminlarni xitaygha qayturup bérishi telep qilin'ghan. Bu yéqinqi bir qanche ay ichide ottura asiyadiki jumhuriyetlerning zéminlirining xitaygha tewe ikenliki tekitlen'gen tunji maqale emes.

Buning aldida qazaqistan we qirghizistanlarning burun xitay zémini ikenliki, ularning qachan xitayning qoynigha qachan qaytip kélidighanliqi tekitlen'gen maqaliler élan qilinip, qazaqistan we qirghizistanlarning naraziliqini qozghighan idi. "Jéymistawn fondi" ning toridiki maqalide tekitlinishiche, yawro-asiyaning mezkur rayonidiki siyasiy jughrapiyilik özgirish ottura asiya döletlirigila tesir qilip qalmaydiken. Maqalide buning amérikadek mezkur rayonda esker turghuzuwatqan gherb küchlirigimu tesir körsitidighanliqi tekitlen'gen.

Maqalide qeyt qilinishiche, tajikistan béyjingning bu maqalini tenqid qilishini we bu xil maqalilerning élan qilishini cheklishini telep qilghan. Maqalide cho yawluning maqalisi bilen tajikistanda xitayning herikitige bolghan endishe téximu kücheygenliki, chünki buning aldida xitayning Uyghur diyaridiki tajikistan'gha chégridash tashqorghanda ayrodrom yasighanliqi tekitlen'gen. Maqalide qeyt qilishiche, xitay bu ayrodromning sayahetke yasalghanliqini ilgiri sürsimu, lékin bu rayon'gha sayahetke kélidighanlar nahayiti cheklik bolup, bu tajiklardiki gumanni téximu kücheytken.

Toluq bet