Uyghurlar diyaridiki térrorluqqa qarshi yerlik qanun xelq'araning diqqitini qozghidi

Shinxu'a agéntliqining xewirige qarighanda 5 - awghust ürümchide “Shinjangning térrorluqqa qarshi turush qanunini ijra qilish charisi” heqqide axbarat élan qilish yighini ötküzülgen. Mezkur “Chare” 29 - iyul küni resmiy maqullan'ghan bolup, 1 - awghusttin bashlap küchke ige bolidighanliqi éytilghan idi.

Sin'gaporda chiqidighan “Boghuz waqti” gézitining maqaliside éytilishiche, bu qétim Uyghur éli da'iriliri maqullighan mezkur yerlik nizamnamide “Xitayning térrorluqqa qarshi turush qanuni” da tilgha élinmay qalghan mezmunlarni toluqlap qanun sheklige kirgüzüsh meqset qilin'ghan.

Xewerge qarighanda, nizamnamide yene “Térrorchi we esebiy guruhlarning yétekchiliri, bashqilarni jinayet ötküzüshke qutratqanlar, diniy esebiylikke qarishi élip bérilghan terbiyelerge qarshi chiqquchilar we zorawanliq qilish xahishi barlarnimu yalghuz kamérlargha qamash” belgilen'gen.

Bu yéngi nizamnamide kishilerni hijretke teshkillesh, ösmürlerge diniy terbiye bérish, xitay hökümiti tarqatqan her xil guwahnamilerni yaki xelq pulini qesten buzuwétish, ijtima'iy taratqularda esebiylikke yatidighan herqandaq pikirni tarqitish qatarliqlarnimu térrorluqqa mensup, dep békitken.

Mezkur gézitning maqaliside yene alahide qilip “Halal” chüshenchisini yémek - ichmek da'irisidin halqighan sahede ishlitishmu térrorluq qilmishigha yatidighanliqi tilgha élin'ghan.

Chet'ellerdiki weziyet analizchiliridin élishat hesen bu qétimqi yéngi nizamname heqqide toxtilip: “Xitayning bu nizamnamini yolgha qoyushi - özlirining Uyghurlarning insan heqlirini basturush heriketlirini qanunlashturushni meqset qilidu” dep körsetti.