Xitay teshwiqatchiliri “Shangxeylik guli” namliq kino ishlep tarqatqan

“Xitay xewerliri tori” ning 15-yanwar chiqarghan xewirige qarighanda, xitay rézhissori wang lusha ishligen “Shangxeylik guli” namliq filim 14-yanwar küni xitay merkiziy téléwiziye istansisi kino qanili teripidin tunji qétim qoyulghan. Xewerde yene, bu filimning “Shinjang Uyghur aptonom rayoni qurulghanliqining 70 yilliqi, yéngi dewr shinjang xizmitining 15 yilliqi, qeshqer iqtisadiy alahide rayoni qurulghanliqini 15 yilliqigha qilin'ghan sowghat ikenliki alahide eskertilgen.

Bu 2019-yili xitay rézhissori fang jünlyang ishlep tarqatqan “Qeshqerlik guli” namliq filimdin kéyin otturigha chiqqan yene bir teshwiqat filimi bolup, her ikki filim xitay hökümitining “Shinjang hékayisini sözlesh” chaqiriqigha maslashqan. Oxshimaydighan yéri, “Qeshqerlik guli” filimde, shénjénliq oqutquchi lyang péng bilen bu sheherge qeshqerdin kelgen “Shinjang toluq ottura mektipi” mes'uli yüen shöning muhebbet hékayisi bayan qilin'ghan bolsa؛ “Shangxeylik guli” filimida yerken nahiyesidin kelgen naway shahi warisi adiljanning ata miras kespige warisliq qilishtin waz kéchip, muzikant bolush ghayiside shangxeyde sersan bolup yürgenliki we bu sheherde öz waqtida “Shinjanggha yardem bérish” ke barghan xitay kadirning ewladi bolghan shén chyenchyen bilen tonushup muhebbetleshkenliki bayan qilin'ghan. Aldinqi filimda ikki makanda yashawatqan xitay yashlirining hékayisi sözlen'gen bolsa؛ kéyinki filimda Uyghur yigit bilen xitay qizning muhebbet hékayisi sözlen'gen. Buningdin xitay teshwiqatchilirining her qaysi milletlerni makan we millet cheklimisidin halqip, bir xitay a'iliside birlishishke teshebbus qiliwatqanliqi namayan bolmaqta.

Xewerde déyilishiche, xitay merkiziy téléwiziye istansisi kino qanili bölümining mudiri lin lining “Shangxeylik guli” namliq filimda kino arqiliq “Shinjang hékayisi” ning sözlen'genlikini, “Qeshqerlik guli” filimidin kéyin yene bir qétim “Shinjang ta'amliri, shinjang menzirisi, shinjang güzelliri” ning namayan bolghanliqini bildürgen.

“Qeshqerlik guli” filimining köp qisim körünüshliride qeshqerning özgiche alahidiliki eks etken bolup, qeshqer sayahetchiliki teshwiq qilin'ghan؛ “Shangxeylik guli” filimida, uzun yil yurtigha qaytmighan adiljanning 10 nechche yildin qaytqinida “Shinjangda qaltis tereqqiyat” bolghanliqidin hayajanlan'ghanliqi ipadilen'gen bolup, xitayning yéqinqi yillardiki “Shinjang teshwiqati” gha maslashqanliqi körülmekte.