Uyghur boks cholpanlirining teshwiqatqa chiqishi guman qozghimaqta

Uyghur diyaridiki zor kölemlik siyasiy tutqunda köpligen Uyghur serxillirining, shu qatarda bir qisim Uyghur tenterbiye cholpanlirining mehbusqa aylandurulushi xelq'arada zor ghulghula qozghighanliqi melum. Xitay hökümitining yéqindin buyan bir qisim Uyghur boks cholpanlirini we ular qolgha keltürgen ghelibilerni teshwiq qilishi bu saheni közitip kéliwatqan bir qisim analizchilarning gumanini qozghidi.

“Xitay xewerler tori” ning 22-yanwardiki xewiride Uyghur boks cholpanliridin élshat enwer we zulpiqar memtilining chongching shehiride ötküzülgen “Memliketlik boks birleshme musabiqisining” 4-pesillik musabiqiside ghelibe qazan'ghanliqi tepsiliy xewer qilin'ghan. Shundaqla ularning “2019-Yili wetinimiz junggo üchün bir altun médal alghum bar” dégenliki eskertilgen.

Xewerde éytilishiche, bu mahirlar tanzaniyelik we xitay reqibler bilen musabiqige chüshken hemde özlirining chéwer we chebdes hujumliri bilen reqiblirini meghlup qilghan.

Melum bolushiche, yéqindin buyan boks türidiki musabiqilerde Uyghurlar diyaridin chiqqan mahirlar zor netijilerni qolgha keltürmekte iken. Emma tenterbiye saheside nam chiqarghan cholpanlarning lagérlargha qamilishi xelq'araning heyranliqini qozghawatqanda boks sahesidiki Uyghur mahirlarning alahide xewer qilinishini bir qisim analizchilar “Xitay hökümitining xelq'aragha saxta körünüsh teyyarlishi. Ular mushu arqiliq xitay hökümitining Uyghurlargha her tereplime purset yaritip bériwatqanliqini teshwiq qilmaqchi” dédi.