Xitay hökümiti Uyghur rayonida “Milletler ittipaqliqi” herikiti qozghidi

Xitay hökümiti Uyghur rayonida “Milletler ittipaqliqini algha sürüsh yili” herikiti qozghap, az sanliq milletler medeniyitige hörmet qilishni tekitligen. Bu pikirni Uyghur aptonom rayonluq partkom sékrétari jang chünshyen 28‏-mart échilghan “Milletler ittipaqliqini algha sürüsh yili” seperwerlik yighinida otturigha qoyghan.

Uyghur rayonda saqal, hijab we bashqa islami simwollargha “Esebiylik” dep zerbe bérip kelgen xitay da'irilirining bu sözi chet'el agéntliqlirining diqqitini qozghighan.

Roytérs agéntliqining charshenbe bergen xewiride, kishilik hoquq teshkilatlirining we muhajirettiki Uyghurlarning “Shinjangdiki jiddiy mesililerning biri, hökümetning Uyghur medeniyiti we islamni kontrol qilishi” dep qaraydighanliqini bildürüp, “Shinjangda Uyghur tili öginidighan yaki Uyghurlar bilen dost bolidighan xitaylarning nahayiti az sanliq” ikenlikini ilgiri sürgen.

Uyghur aptonom rayonluq partkomning 28‏-mart seperwerlik yighinigha xitay kompartiyesi merkizi birliksep bölümining bashliqi sün chünlen qatnashqan idi. Yighinda jang chünshyen: “Biz perqlerge hörmet qilishimiz, oxshimighan örp-adetlerge hörmet bilen mu'amile qilip, jem'iyette oxshimighan xeqlerning medeniyiti we örp-adetlirige hörmet muhiti yaritishimiz kérek” dégen.

Roytérsning bildürüshiche, jang chünshyen “Diniy esebiylik” ke qarshi küresh ilgirileshke ériship, milletler öz ‏- ara yéqinlashqanliqini tekitligen bolsimu, emma milliy ixtilap kücheygenlikini étirap qilghan.