Хитай һөкүмити уйғур районида "милләтләр иттипақлиқи" һәрикити қозғиди

Мухбиримиз әркин
2016-03-31
Share

Хитай һөкүмити уйғур районида "милләтләр иттипақлиқини алға сүрүш йили" һәрикити қозғап, аз санлиқ милләтләр мәдәнийитигә һөрмәт қилишни тәкитлигән. Бу пикирни уйғур аптоном районлуқ партком секретари җаң чүншйән 28‏-март ечилған "милләтләр иттипақлиқини алға сүрүш йили" сәпәрвәрлик йиғинида оттуриға қойған.

Уйғур районда сақал, һиҗаб вә башқа ислами символларға "әсәбийлик" дәп зәрбә берип кәлгән хитай даирилириниң бу сөзи чәтәл агентлиқлириниң диққитини қозғиған.

Ройтерс агентлиқиниң чаршәнбә бәргән хәвиридә, кишилик һоқуқ тәшкилатлириниң вә муһаҗирәттики уйғурларниң "шинҗаңдики җиддий мәсилиләрниң бири, һөкүмәтниң уйғур мәдәнийити вә исламни контрол қилиши" дәп қарайдиғанлиқини билдүрүп, "шинҗаңда уйғур тили өгинидиған яки уйғурлар билән дост болидиған хитайларниң наһайити аз санлиқ" икәнликини илгири сүргән.

Уйғур аптоном районлуқ парткомниң 28‏-март сәпәрвәрлик йиғиниға хитай компартийәси мәркизи бирликсәп бөлүминиң башлиқи сүн чүнлән қатнашқан иди. Йиғинда җаң чүншйән: "биз пәрқләргә һөрмәт қилишимиз, охшимиған өрп-адәтләргә һөрмәт билән муамилә қилип, җәмийәттә охшимиған хәқләрниң мәдәнийити вә өрп-адәтлиригә һөрмәт муһити яритишимиз керәк" дегән.

Ройтерсниң билдүрүшичә, җаң чүншйән "диний әсәбийлик" кә қарши күрәш илгириләшкә еришип, милләтләр өз ‏- ара йеқинлашқанлиқини тәкитлигән болсиму, әмма миллий ихтилап күчәйгәнликини етирап қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт