"австралийәлик" гезити тәһрирати хитайниң уйғурлар һәққидики тәшвиқатини әйиблиди

Мухбиримиз ирадә
2021-04-08
Share

Австралийәдики нопузлуқ ахбаратларниң бири болған "австралийәлик" намлиқ гезит тәһрирират мақалиси елан қилип, хитайниң уйғурлар һәққидә тарқитиватқан тәшвиқатлирини әйиблиди.

8-Април күнидә елан қилинған тәһрират мақалисида билдүрүшичә, хитайниң канберрада турушлуқ әлчиханиси 7-април күни мухбирларни йиғип уларға уйғурларниң қанчилик бәхтияр яшаватқанлиқи, районда зор тәрәққиятларни бәрпа қилғанлиқини тәшвиқ қилған. Мақалидә мундақ дийилгән: "7-април күни хитайниң канберрадики әлчиханисида журналистларға көрситилгән видийо худди ‹музика садаси' намлиқ филимниң ечилишиға охшашла җәлпкар вә көркәм иди. Хитай баш әлчиси чең җиңйе бизгә ‹ғәрб таратқулиридики бурмиланған хәвәрләрни унтуп кетиңлар, ' дәп қоюп бәргән алтә минутлуқ ‹шинҗаң аҗайип бир йәр' намлиқ филимгә қариғанда, хитай коммунистик партийәси бу районни өзгәртип, у йәрдә ‹иқтисадий тәрәққият, иҗтимаий муқимлиқ, турмушни яхшилаш вә диний инақлиқ' бәрпа қилған имиш. Шинҗаң һазир һаятлиққа толған вә гүллинип һаятий күчкә толған йәр имиш."

"австралийәлик" гезити тәһрират мақалисида хитай һөкүмитиниң бу видийолирида лагерларни, мәҗбурий әмгәкни, лагерларда йүз бериватқан инсан қелипидин чиққан қийин-қистақ, басқунчилиқ вәқәлирини тилға елипму қоймиғанлиқини әскәртип өткән вә төвәндикиләрни баян қилған: "хитай бундақ гөдәкләрчә видийолар билән мүшүкейиқниң бинәпшә болидиғанлиқини испатлаймиз дәп вақит исрап қилишниң орниға, австиралийә билән болған иқтисадий мунасивитини әслигә кәлтүрүш үчүн тиришса, өзиниң мәнпәәтигә пайдилиқ һәрикәт қилған болатти. У хитай сода министири ваң вентав билән австралийә сода министири дан техан оттурисидики алақини қайтидин ечиветиштин башлиниши мумкин."

Мақалида хитай австралийәгә иқтисадий җаза йүргүзгәндин кейин, австралийәлик екиспорт қилғучилар азрақ зиян тартқан болсиму, бирақ улар зиянниң орнини толдурушниң йоллирини аллибурун тепип, башқа дөләтләр билән содилирини күчәйткәнликини, шуңа буниң нәтиҗисиниң йәнила хитайниң өзигә зиянлиқ икәнликини баян қилған вә ахирида совет иттипақи мәзгилини әслитидиған бундақ тәшвиқатларниң һечқандақ иҗабий тәсири болмайдиғанлиқини әскәрткән.

7-Април күни хитай даирилири үрүмчидә "шинҗаң яхши җай" намлиқ австралийәгә қаритилған мәхсус мәйдан синлиқ пикир алмаштуруш йиғини өткүзгән иди. Мәзкур йиғин нурғун хәлқаралиқ ахбаратларда тәнқидкә учриди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт