"Awstraliyelik" géziti tehrirati xitayning Uyghurlar heqqidiki teshwiqatini eyiblidi

Muxbirimiz irade
2021-04-08
Share

Awstraliyediki nopuzluq axbaratlarning biri bolghan "Awstraliyelik" namliq gézit tehririrat maqalisi élan qilip, xitayning Uyghurlar heqqide tarqitiwatqan teshwiqatlirini eyiblidi.

8-April künide élan qilin'ghan tehrirat maqalisida bildürüshiche, xitayning kanbérrada turushluq elchixanisi 7-april küni muxbirlarni yighip ulargha Uyghurlarning qanchilik bextiyar yashawatqanliqi, rayonda zor tereqqiyatlarni berpa qilghanliqini teshwiq qilghan. Maqalide mundaq diyilgen: "7-April küni xitayning kanbérradiki elchixanisida zhurnalistlargha körsitilgen widiyo xuddi 'muzika sadasi' namliq filimning échilishigha oxshashla jelpkar we körkem idi. Xitay bash elchisi chéng jingyé bizge 'gherb taratquliridiki burmilan'ghan xewerlerni untup kétinglar, ' dep qoyup bergen alte minutluq 'shinjang ajayip bir yer' namliq filimge qarighanda, xitay kommunistik partiyesi bu rayonni özgertip, u yerde 'iqtisadiy tereqqiyat, ijtima'iy muqimliq, turmushni yaxshilash we diniy inaqliq' berpa qilghan imish. Shinjang hazir hayatliqqa tolghan we güllinip hayatiy küchke tolghan yer imish."

"Awstraliyelik" géziti tehrirat maqalisida xitay hökümitining bu widiyolirida lagérlarni, mejburiy emgekni, lagérlarda yüz bériwatqan insan qélipidin chiqqan qiyin-qistaq, basqunchiliq weqelirini tilgha élipmu qoymighanliqini eskertip ötken we töwendikilerni bayan qilghan: "Xitay bundaq gödeklerche widiyolar bilen müshük'éyiqning binepshe bolidighanliqini ispatlaymiz dep waqit israp qilishning ornigha, awstiraliye bilen bolghan iqtisadiy munasiwitini eslige keltürüsh üchün tirishsa, özining menpe'etige paydiliq heriket qilghan bolatti. U xitay soda ministiri wang wéntaw bilen awstraliye soda ministiri dan téxan otturisidiki alaqini qaytidin échiwétishtin bashlinishi mumkin."

Maqalida xitay awstraliyege iqtisadiy jaza yürgüzgendin kéyin, awstraliyelik ékisport qilghuchilar azraq ziyan tartqan bolsimu, biraq ular ziyanning ornini toldurushning yollirini alliburun tépip, bashqa döletler bilen sodilirini kücheytkenlikini, shunga buning netijisining yenila xitayning özige ziyanliq ikenlikini bayan qilghan we axirida sowét ittipaqi mezgilini eslitidighan bundaq teshwiqatlarning héchqandaq ijabiy tesiri bolmaydighanliqini eskertken.

7-April küni xitay da'iriliri ürümchide "Shinjang yaxshi jay" namliq awstraliyege qaritilghan mexsus meydan sinliq pikir almashturush yighini ötküzgen idi. Mezkur yighin nurghun xelq'araliq axbaratlarda tenqidke uchridi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet