Хитай даирилири уйғур райони һәққидики чәт әл тәшвиқатини юқири пәллигә көтүрмәктә

Вашингтондин мухбиримиз җәвлан тәйярлиди
2024.04.09

Хитай даирилири уйғур райони һәққидики тәшвиқатлирини һөкүмәт таратқулири арқилиқ елип бериш билән қанаәтләнмәй, бир қисим чәт әл таратқулирини ишқа селишни башлиған.

“хитай хәвәрлири тори” ниң 9-апрел күни чиқарған хәвиригә қариғанда, хитай һөкүмити 21 дөләттин кәлгән 26 таратқуниң мәсуллирини үрүмчигә топлап, “йипәк йоли иқтисад бәлбеғини қурғучи дөләтләр таратқу мәсуллири муһакимә йиғини” ачқан. Һөкүмәтниң орунлаштуруши бойичә, бу 26 таратқуниң мәсуллири үрүмчи, корла, қәшқәр қатарлиқ җайларда зиярәттә болидикән.

Хитай дөләт ишлири мәһкимиси (говуйүән) ахбарат ишханиси, хитай чәт әл тиллири ахбарат-нәшрият идариси, уйғур аптоном районлуқ партком тәшвиқат бөлүми бирликтә уюштурған бу муһакимә йиғинида “шинҗаңниң йипәк йолиниң түгүни, хитайниң ғәрбкә ечилған дәрвазиси вә алтун көврүки” икәнликини тонутуш, “шинҗаңниң һәқиқий әһвалини вә тәрәққиятини дуняға билдүрүш” алаһидә тәкитләнгән болуп, хитайниң йиллардин бери давамлаштуруп кәлгән “шинҗаң һекайисини сөзләш” тәшвиқатиниң юқири сәвийәгә көтүрүлгәнликиниң ипадиси дәп қаралмақта. Буниң алдида уйғур аптоном районлуқ парткомниң секретари ма шиңрүй 27-март күни үрүмчидә бир қисим әрәб дөләтлириниң “сиясий партийә вәкиллири тәкшүрүш өмики” ни күтүвелип, уларни хәлқара җәмийәткә “тинч-инақ, һаятий күчкә толған гүзәл шинҗаң һекайисини сөзләп бериш” кә дәвәт қилғаниди.

Сиясий көзәтчи илшат һәсән бу һәқтә радийомизға қилған сөзидә, хитайниң “шинҗаң һекайисини сөзләш” кә бунчә әһмийәт беришини “ирқий қирғинчилиқ йүргүзүп өз намини сеситқан хитайниң өз образини яхшилашқа урунушидин башқа нәрсә әмәс” дәп чүшәндүргәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.