Xitay da'iriliri Uyghur rayoni heqqidiki chet el teshwiqatini yuqiri pellige kötürmekte

Washin'gtondin muxbirimiz jewlan teyyarlidi
2024.04.09

Xitay da'iriliri Uyghur rayoni heqqidiki teshwiqatlirini hökümet taratquliri arqiliq élip bérish bilen qana'etlenmey, bir qisim chet el taratqulirini ishqa sélishni bashlighan.

“Xitay xewerliri tori” ning 9-aprél küni chiqarghan xewirige qarighanda, xitay hökümiti 21 dölettin kelgen 26 taratquning mes'ullirini ürümchige toplap, “Yipek yoli iqtisad belbéghini qurghuchi döletler taratqu mes'ulliri muhakime yighini” achqan. Hökümetning orunlashturushi boyiche, bu 26 taratquning mes'ulliri ürümchi, korla, qeshqer qatarliq jaylarda ziyarette bolidiken.

Xitay dölet ishliri mehkimisi (gowuyüen) axbarat ishxanisi, xitay chet el tilliri axbarat-neshriyat idarisi, Uyghur aptonom rayonluq partkom teshwiqat bölümi birlikte uyushturghan bu muhakime yighinida “Shinjangning yipek yolining tügüni, xitayning gherbke échilghan derwazisi we altun köwrüki” ikenlikini tonutush, “Shinjangning heqiqiy ehwalini we tereqqiyatini dunyagha bildürüsh” alahide tekitlen'gen bolup, xitayning yillardin béri dawamlashturup kelgen “Shinjang hékayisini sözlesh” teshwiqatining yuqiri sewiyege kötürülgenlikining ipadisi dep qaralmaqta. Buning aldida Uyghur aptonom rayonluq partkomning sékrétari ma shingrüy 27-mart küni ürümchide bir qisim ereb döletlirining “Siyasiy partiye wekilliri tekshürüsh ömiki” ni kütüwélip, ularni xelq'ara jem'iyetke “Tinch-inaq, hayatiy küchke tolghan güzel shinjang hékayisini sözlep bérish” ke dewet qilghanidi.

Siyasiy közetchi ilshat hesen bu heqte radiyomizgha qilghan sözide, xitayning “Shinjang hékayisini sözlesh” ke bunche ehmiyet bérishini “Irqiy qirghinchiliq yürgüzüp öz namini sésitqan xitayning öz obrazini yaxshilashqa urunushidin bashqa nerse emes” dep chüshendürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.