Uyghur rayoni da'iriliri yéngi zélandiye weqesinimu özini aqlash üchün pakit qilishqa urun'ghan

Muxbirimiz shöhret hoshur
2019-04-10
Élxet
Pikir
Share
Print

Ashkarilinishiche, "Wal strét zhurnali" yéqinda ürümchide Uyghur mehelliride élip bériliwatqan qurulushlar we meschitlerge orunlashturulghan közitish apparatliri heqqide Uyghur rayonidiki alaqidar orunlargha fakis arqiliq so'al yollighan.

So'allarning biride bu qurulush we apparatlirining meqsiti Uyghurlarni nazaret astigha élish yaki emesliki soralghan. Bu so'algha bir mehel kéchikip jawab qayturghan da'iriler, meschitlerge orunlashturulghan közitish apparatlirining meschit jama'itining bixeterlikini qoghdash üchün ikenlikini, jama'etning bu apparatlar arqiliq gumanliq kishilerni saqchigha melum qilidighanliqi we hujumdin qoghdilidighanliqini chüshendürgen.

Da'iriler jawab xétide bu chüshendürüshining mentiqliq ikenlikini bildürüsh üchün ötken ayda yéngi zélandiyediki ikki meschitte yüz bergen térrorluq weqesini eslitip ötken.

Xette ochuq halda: "Yéngi zélandiyediki meschitte köp sanda bigunah kishilerning ölgenliki biz üchün chong signal؛ shunga meschitlerge közitish apparati orunlashturghanliqimiz musulmanlarning özini we diniy pa'aliyetlirini qoghdash üchündur" déyilgen.

"Wal strét zhurnali "Ning bügünki bu heqtiki xewiride xitayning yéngi zélandiye misalini pütünley orunsiz qollan'ghanliqi pakitlar bilen körsitilgen. Xewerde déyilishiche, xitay da'iriliri Uyghurlarni özlirige tehdit yaki emes dep ayrishta, ularning diniy pa'aliyetlirini asas qilmaqta؛ Uyghurlarning "Qur'ani kerim" ni öyliride saqlishimu jinayet sanalmaqta.

Mezkur gézit bügünki xewiride ürümchidiki Uyghur mehellilirining chéqilishi, chong bazardiki Uyghur tijaretchilerning dukanlarning taqilishi, kochidiki Uyghur nawaylarning aziyishi qatarliq yéngi ré'alliqlarnimu teswirlep ötken.

Toluq bet