Хотәндики уйғур оқуғучиларға бейҗиңдин "ярдәм" келидикән

Мухбиримиз җәвлан
2021-05-05
Share

"тәңритағ" ториниң йеқинда хәвәр қилишичә, бейҗиң яшлар фонди билән шинҗаң яшлар фонди бирлишип, хотәндики яш-өсмүрләргә "ярдәм буюмлири" ианә қилған. "бейҗиңда аиләм бар" намида елип бериливатқан бу паалийәт 2018-йил башланған болуп, 4 йилдин буян аилиси намрат 62 оқуғучиға 3600 дин артуқ "ярдәм буюмлири" ианә қилинған.

Хәвәрдә ейтилишичә, бу "ярдәм буюмлири" асасән үстәл чириғи, компютер, бейҗиңдики хан сарийи вә башқа даңлиқ асарә-әтиқиләр нәқишләнгән оқуш қораллири қатарлиқлар болуп, оқуғучиларниң бейҗиңдики тарихий ядикарлиқлар вә мәдәнийәт излириға болған қизиқишини қозғайдикән. Бир башланғуч мәктәпниң хитай мудири мундақ дегән: "бу совғатлар қәдирликтур, бу ярдәмләр бибаһадур. Мән ишинимәнки, бу ярдәмгә еришкән оқуғучилар техиму тиришип өгинип, партийә әнәнисигә варислиқ қилип, йеңилиқ яритип, җәңгивар из басарларға айлиниду вә көпчиликниң үмидини йәрдә қоймайду".

Көзәтчиләрниң қаришичә, хитай һөкүмити һазир уйғур мәктәпләрниң һәммисини дегүдәк идийәси қизиллашқан хитай маарипчилириға тутқузуп қойған болуп, улар мәктәпләргә куңзи-меңзиларниң һәйкилини тикләп, синипқа ши җинпиңларниң рәсимини чаплап, хитай мәдәнийити вә партийә идийәсини китабтин тартип оқуш қораллириғичә сиңдүрүп, уйғур оқуғучиларниң көрүш сәзгүсидин ой-хияллириғичә һәммини контрол қилип, өз мәдәнийитидин қилчә бихәвәр бир әвлад уйғурларни йетиштүрүшни муһим вәзипә қилған. "бейҗиңда аиләм бар" намида елип бериливатқан бу паалийәтму әмәлийәттә уйғур оқуғучиларға хитайни яхши көрситиш вә уларни хитай мәдәнийитигә һәвәсләндүрүшни мәқсәт қилған бир паалийәт болуп, берилгән совғатларни "шекәр ялитилған зәһәр" дейишкә болиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт