Xitay amérikadiki elchixanisida axbarat yighini ‍ötküzüp, Uyghurlargha “‍Irqiy qirghinchiliq” qilghanliqini ‍inkar qilghan

Xitay hökümiti 6-may xitayning amérikadiki elchixanisida bu yildiki “Eng ghelite axbarat yighinliri” ning birini ötküzüp, ‍özining Uyghurlargha “Irqiy qirghinchiliq” qilghanliqini yene ret qilghan. Xitay da'irilirining yighinda ilgiri sürüshiche, shinjangda puqralarning tamaq, kiyim-kéchek, ma'arip we dawalinish hel qilinip, az sanliq milletlerning til-yéziqi, medeniyiti qoghdalmaqta we tereqqi qildurilmaqta,” iken.

Tor arqiliq ‍ötküzülgen “Shinjang bir güzel makan” namlik axbarat yighinda Uyghur ayallirining atalmish “Wekil” lirini, “Kespiy terbiyelesh merkizi” ni püttürgen kursantlarni, meschid imamlirini, sirtqa chiqip ishleydighan ishlemchilerni we hetta Uyghur aptonom rayonining re'isi shöhret zakirni sözletken. Xitay hökümiti büning aldida ‍awstraliye, yéngi zélandiye qatarliq döletlerdimu Uyghur mesilisini téma qilghan bu xil “Ghelite” axbarat yighinlirini ötküzüp, özining “Irqiy qirghinchiliq” qilghanliqini ret qilghan idi.

Közetküchilerning éytishiche, gherb elliride xitayning Uyghurlargha “Irqiy qirghinchiliq” qilghanliqini étirap qilidighan döletlerning köpiyishi, xitayni endishige sélip, uning bu xil ghelite axbarat yighinlirini ötküzüshige türtke bolmaqta ‍iken. Yighinida shöhret zakir Uyghur élida “Xitay kompartiyesining diniy erkinlikni qoghdash syasitining toluq ‍ijra qilin'ghanliqi, adettiki diniy pa'aliyetler we étiqatchi ammining éhtiyajlirining toluq kapaletke ige qilin'ghanliqi” ni bildürgen. Biraq u weziyet eger shundaq bolsa néme üchün xelq'araning rayonda tekshürüsh élip bérishigha yol qoymaydighanliqigha chüshenche bermigen.