Хитай даирилири америка тәвәликидики хитайлар арқилиқ уйғур қирғинчилиқини ақлимақта

Вашингтондин мухбиримиз әзиз тәйярлиди
2024.05.14

Хитай башқурушидики “шинхуа агентлиқи” ниң йеқинқи хәвиридә ейтилишичә, 10- вә 13-май күнлири уйғур аптоном районлуқ һөкүмәтниң рәиси әркин туняз вә партком секретари ма шиңруй үрүмчи шәһиригә зиярәткә кәлгән иран баш әлчиси муһсин бәхтияр (Mohsen Bakhtiar) вә “америка хитай муһаҗирлири хәлқара пән-техника вә сода-санаәтчиләр бирләшмиси” вәкилләр өмики билән сөһбәтләшкән.

Сөһбәттә хитай даирилири “биз йеқинқи йилларда баш секретар ши җинпиңниң биваситә рәһбәрликидә мәдәнийәт, иқтисад вә башқа саһәләрдә шинҗаңда бир қатар мувәппәқийәтләрни қолға кәлтүрдуқ” дейиш арқилиқ васитилик һалда уйғур дияридики қирғинчилиқни йәнә бир қетим инкар қилишқа урунған. Шуниңдәк вә “америка хитай муһаҗирлири хәлқара пән-техника вә сода-санаәтчиләр бирләшмиси” ниң йиллардин буян “шинҗаңдики түрлүк хизмәтләрни йеқиндин қоллап келиватқанлиқи” ға болған тәшәккүрини ипадилигән.

“шинҗаң уйғур аптоном районлуқ хәлқ һөкүмити” ниң торида берилгән бу һәқтики хәвәрдә ейтилишичә, уйғур дияридики тәрәққият пурсәтлириниң көплүки, байлиқ қезишни асас қилған юқири сүпәтлик тәрәққиятниң нөвәттә баш вәзипә болуватқанлиқи, болупму җәмийәт муқим болуватқан һәмдә “сәккиз чоң кәсипләшкән база қурулуши” җиддий давам қиливатқан шараитта уйғур дияриниң дәл мушу хил “сода-санаәтчиләр вә пән-техника хизмәтчилири” гә моһтаҗ икәнлики алаһидә әскәртилгән. Шуниң билән бирликтә америка тәвәликидики хитай муһаҗирлириниң хатирҗәм һалда уйғур дияриға мәбләғ селиши, уларниң уйғур дияридики кәсипләшкән тәрәққият қурулуши түрлири бойичә өзара һәмкарлиқ орнитишиға көплигән қулайлиқларниң яритип берилидиғанлиқи һәққидә сөз болған.

Һалбуки уйғур пән-техника чолпанлири, җүмлидин ташполат тейип, халмурат ғопурға охшаш дуняви алимлар “икки йүзлимилик” билән әйиблинип түрмигә ташланғанда хитай даирилириниң “америка тәвәликидики хитай муһаҗирлириниң тәрәққият қурулушиға иштирак қилишини қарши алимиз” дейиши нөвәттә хитай һөкүмитиниң мустәмликичилик характерини йәнә бир қетим намаян қилип бәргәнлик, дәп қариливатқанлиқи мәлум. Болупму уларниң “шинҗаңни тәрәққий қилдуруш” намида хитай өлкилиридики ишләпчиқириш завутлирини уйғур дияриға йөткәш, уйғурларниң илкидики йәрләрни мәҗбурий һалда хитай көчмәнлиригә елип бериш қилмишлири кәскин тәнқид қилиниватқанда техиму илгирилигән һалда “америка тәвәликидики хитай муһаҗирлириниң мәбләғ селишини қарши алидиғанлиқи” ни тәкитлиши көплигән соалларни туғдурмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.