Хитай шенҗенда “шинҗаң яхши җай” тәшвиқат паалийити өткүзүп, хитай саяһәтчилирини уйғур райониға келишкә чақирған

23-Май күни уйғур аптоном районлуқ даириләр хитайниң шенҗен шәһиридә “шинҗаң яхши җай” мәдәнийәт саяһәтчиликини илгири сүрүш йиғини уюштурған.

Хитайниң “тәңритағ тори” ниң хәвиригә қариғанда, “шинҗаң яхши җай” намлиқ мәдәнийәт вә саяһәт кәспигә мәбләғ селишни илгири сүрүш шенҗен хәлқара мәдәнийәт санаити көргәзмисидики ачқучлуқ түрләрниң бири икән. Униңда йәнә қәшқәр шәһәрлик мәдәнийәт саяһитигә мәбләғ селишни илгири сүрүш вә башқа тәшвиқат паалийәтлириму өткүзүлгән.

Униңда дейилишичә, уйғур аптоном районлуқ даириләр бу паалийәт арқилиқ “райондики муһим саяһәт орунлириға мәбләғ селиш йошурун күчини ашуруп, шинҗаңниң мол байлиқ әвзәлликини мәһсулат әвзәллики вә санаәт әвзәлликигә айландурушини үмид қилидиғанлиқини” билдүрүшкән.

Хитай даирилири йеқинқи бир қанчә йилдин буян уйғур елидә саяһәтчиликни күчәп тәшвиқ қилишқа башлиған иди. Униң бу һәқтә чәт әлләргә қаратқан тәшвиқатиму көрүнәрлик артқан. Хитай даирилириниң ирқий қирғинчилиқ вә инсанийәткә қарши җинайәт давам қиливатқан уйғур елидә саяһәтчиликни тәшвиқ қилиши, чәт әлләрдә диққәт қозғап кәлмәктә.

22-Май күни уйғур районлуқ парткомниң секретари ма шиңруй парткомниң йиғинида саяһәтчилик мәсилисини алаһидә тәкитләп, “саяһәтчиликни тәрәққий қилдуруш шинҗаңниң юқири сүпәтлик тәрәққияти вә әбәдий әминликидә алаһидә муһим әһмийәткә игә” дегән. Ма шиңруй йәнә “саяһәтчиликтә ‛шинҗаң яхши җай‚ даңлиқ марка образи яритишни тутқа қилип, ‛тәклип қилиш‚ билән ‛сиртқа чиқириш” ни бирләштүрүштә чиң туруш керәк” дегән.

Хитай һөкүмити өзиниң уйғур елидә йүргүзүватқан ирқий қирғинчилиқини инкар қилиш вә уни пәрдазлап көрситиш һәрикитиниң бир қисми сүпитидә өзигә майил дөләтләрдин саяһәтчиләрни тәшкилләш, оқуғучи алмаштуруш программилирини йолға қоюп, районда америка қатарлиқ демократик дөләтләр илгири сүрүватқан қирғинчилиқниң мәвҗут әмәслики тоғрилиқ лап уруп кәлмәктә. Һалбуки, хитайниң бу сахта сиясий тәшвиқати вә дуняни алдаш тактикисиниң ич йүзи аллиқачан хәлқара җамаәткә ашкара болмақта.