Xitay shénjénda “Shinjang yaxshi jay” teshwiqat pa'aliyiti ötküzüp, xitay sayahetchilirini Uyghur rayonigha kélishke chaqirghan

Washin'gtondin muxbirimiz irade teyyarlidi
2024.05.23

23-May küni Uyghur aptonom rayonluq da'iriler xitayning shénjén shehiride “Shinjang yaxshi jay” medeniyet sayahetchilikini ilgiri sürüsh yighini uyushturghan.

Xitayning “Tengritagh tori” ning xewirige qarighanda, “Shinjang yaxshi jay” namliq medeniyet we sayahet kespige meblegh sélishni ilgiri sürüsh shénjén xelq'ara medeniyet sana'iti körgezmisidiki achquchluq türlerning biri iken. Uningda yene qeshqer sheherlik medeniyet sayahitige meblegh sélishni ilgiri sürüsh we bashqa teshwiqat pa'aliyetlirimu ötküzülgen.

Uningda déyilishiche, Uyghur aptonom rayonluq da'iriler bu pa'aliyet arqiliq “Rayondiki muhim sayahet orunlirigha meblegh sélish yoshurun küchini ashurup, shinjangning mol bayliq ewzellikini mehsulat ewzelliki we sana'et ewzellikige aylandurushini ümid qilidighanliqini” bildürüshken.

Xitay da'iriliri yéqinqi bir qanche yildin buyan Uyghur élide sayahetchilikni küchep teshwiq qilishqa bashlighan idi. Uning bu heqte chet ellerge qaratqan teshwiqatimu körünerlik artqan. Xitay da'irilirining irqiy qirghinchiliq we insaniyetke qarshi jinayet dawam qiliwatqan Uyghur élide sayahetchilikni teshwiq qilishi, chet ellerde diqqet qozghap kelmekte.

22-May küni Uyghur rayonluq partkomning sékrétari ma shingruy partkomning yighinida sayahetchilik mesilisini alahide tekitlep, “Sayahetchilikni tereqqiy qildurush shinjangning yuqiri süpetlik tereqqiyati we ebediy eminlikide alahide muhim ehmiyetke ige” dégen. Ma shingruy yene “Sayahetchilikte ‛shinjang yaxshi jay‚ dangliq marka obrazi yaritishni tutqa qilip, ‛teklip qilish‚ bilen ‛sirtqa chiqirish” ni birleshtürüshte ching turush kérek” dégen.

Xitay hökümiti özining Uyghur élide yürgüzüwatqan irqiy qirghinchiliqini inkar qilish we uni perdazlap körsitish herikitining bir qismi süpitide özige mayil döletlerdin sayahetchilerni teshkillesh, oqughuchi almashturush programmilirini yolgha qoyup, rayonda amérika qatarliq démokratik döletler ilgiri sürüwatqan qirghinchiliqning mewjut emesliki toghriliq lap urup kelmekte. Halbuki, xitayning bu saxta siyasiy teshwiqati we dunyani aldash taktikisining ich yüzi alliqachan xelq'ara jama'etke ashkara bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.