Uyghur rayonidiki istatistika xizmiti 10 yildin béri ichkiri xitay ölkilirining yardimige tayan'ghan

• Muxbirimiz jewlan
  2021-06-02

Yéqinda xitayning “Memliket boyiche shinjanggha nuqtiliq yardem bérish istatistika xizmiti birleshme yighini” échilghan bolup, Uyghur rayonigha nuqtiliq yardem bérish istatistika xizmitining 10 yilliq netijisi xulase qilin'ghan hemde “14-Besh yilliq pilan” mezgilide “Shinjanggha nuqtiliq yardem bérish istatistika xizmiti wezipisi” orunlashturulghan.

Yighinda ichkiri xitayning “Shinjanggha omumyüzlük yardem bérish, qaratmiliq yardem bérish, uzun muddet yardem bérish, istatistika xizmitini téximu muhim orun'gha qoyush, her türlük istatistika wezipilirini emelge ashurush” nishani belgilen'gen bolup, bu xizmetning “Shinjangning muqimliqi we tereqqiyati üchün intayin muhim ehmiyetke ige ikenliki” tekitlen'gen.

Tehlilchilerning bildürüshiche, istatistika xizmiti her xil uchurlarni toplash, retlesh, tehlil qilish we tetqiq qilish xizmiti bolup, bir rayonning nopus, iqtisad we tereqqiyat ehwalini yipidin yingnisighiche bilishning muhim qorali hésablinidu. Xitay hökümiti Uyghur rayonini toluq kontrol qilish, bashqurush, közitish we siyaset belgilesh üchün bu qoraldin paydilinidu. Hetta xitaydiki barliq memuriy orun, kespiy orun, karxana, shirket, tetqiqat orunliri we shexslermu istatiskidin paydilinip özi heqqidiki sanliq melumatlarni igileydu, tedbir belgileydu we öz ehwalini özgerteleydu. Bügünkidek uchur dewride, xitay hökümiti bundaq muhim qoralni tamamen öz ilkige alghan bolup, shu sewebtin ichkiri xitaydiki her qaysi ölkilerni Uyghur rayonidiki her qaysi wilayet, nahiyelerge bu xizmet üchün nuqtiliq yardem bergüzüshke orunlashturghan.