Uyghur diyarida 24 milyondin artuq kishige “Saghlamliq kartisi” tarqitilghan

“Shnjang géziti” ning 8-iyundiki xewiride éytilishiche, Uyghur diyaridiki 24 milyondin artuq kishige pütün xitay teweside ortaq ishleydighan “Ahaliler saghlamliq kartisi” tarqitilghan. Xewerde éytilishiche, puqralar bu karta arqiliq doxturxanilarda nomur élish, késel körsitish dégendek dawalinishqa da'ir resmiyetlerni béjirse bolidiken. 

Xewerde buning puqralar bilen dawalinish mu'esseseliri otturisidiki uchur alaqisini kücheytish rolini oynaydighanliqi alahide tekitlen'gen. Shuningdek puqralarning salametlik uchurini toplap bashqurushqa qolayliq yaritidighanliqimu eskertilgen. Emma muhajirettiki analizchilar buning emeliyette xitay hökümitining ‍uyghurlarni téximu qattiq kontrol qilishidiki bir muhim waste bolup qélishi mumkinlikini algha sürmekte. Amérikadiki musteqil analizchi élshat hesen xitay hökümitining ötken birnechche yilda pütkül Uyghurlarning qan ewrishkisi we bashqa bi'ologiyelik uchurlirini toluq sistémilashturup chiqqanliqini tekitlep: “Shübhisizki, sherqiy türkistandiki xitay puqraliri bu xildiki kartini dawalinishqa ishlitishi mumkin, emma Uyghurlar üchün undaq emes. Buningdiki muhim meqset yenila Uyghurlarni pütün xitay miqyasida téximu ünümlük kontrol qilishni közleshtur,” dédi. 

Alaqidar xewerlerde körsitilishiche, bu xildiki saghlamliq kartisi xitay miqyasida tarqitilghan bolup, puqralarning tughulghandin tartip ölüp ketkiche bolghan barliq saghlamliq uchurliri mushu kartida saqlinidiken.