Uyghurlar diyaridiki "Lopnurluqlarni gewdilendürüsh" teshwiqati diqqet qozghimaqta

Muxbirimiz eziz
2019-06-13
Élxet
Pikir
Share
Print

Xitay da'iriliri nöwette Uyghurlar diyarida qanat yayduruwatqan "Shinjang yaxshi jay" témisidiki teshwiqat pa'aliyitide Uyghurlar diyaridiki ajayibatlar qatarida lopnurdiki Uyghurlarning özgiche medeniyiti nuqtiliq orun tutqan. Shundaqla buningdiki xitaylarni hang-tang qalduridighan köpligen amillar xitay sayahetchilerni Uyghurlar diyarigha köplep sayahetke kélishke dewet qilish üchün ishlitilgen. Emma buningdiki bir qisim mezmunlarni alim-mutexessisler "Hangwaqtilarche jöylüsh" dep körsetti.

"Tengritagh" torining 13-iyundiki xewiride éytilishiche, xitay sayahetchiler "Lopnurluqlar kenti" de "Qalmaqlarning sherqqe köchüp kélishi heqqidiki riwayetlerni anglighan" shundaqla lopnurluq Uyghurlarning özgiche malxaylirigha qarapla ularni mongghullargha baghlap qoyghan.

Bu teshwiqat matériyallirida Uyghur diyarida qedimki waqitlardin bashlapla lopnurluqlarning yashighanliqi, jang chyen we shu'en zang qatarliq xitay seyyahlirining bu makanda qandaq izlarni qaldurghanliqi bayan qilin'ghan. Emma Uyghurlar heqqide bir jümlimu söz qilinmighan. Shundaqla "Lopnurluqlar" alahide bir milliy terkib süpitide Uyghurlardin pütünley mustesna halda teswirlen'gen.

Alaqidar matériyallarda körsitilishiche, xitay da'iriliri ötken esirning bashlirida ghulja Uyghurlirini "Taranchilar" dégen namda ayrim millet qilip ayrip chiqqan hemde ularni Uyghurlardin perqliq bolghan bir millet, dep jakalighan idi. Emdilikte lopnur Uyghurlirinimu mushundaq bir shekilde gewdilendürmekchi bolghanliqigha Uyghur alim-mutexessisliri guman neziri bilen qarawatqanliqi melum.

Toluq bet