Сүний әқил техникиси билән ясап чиқилған сахта һесабатлар хитай тәшвиқатини қилиш үчүн қоллинилған

Мухбиримиз ирадә
2021-08-05
Share

BBC Ториниң хәвәр қилишичә, йеқинда сахта учурларға қарши паалийәт қилидиған "учур қаршилиқи мәркизи" намлиқ бир тәтқиқат орни чәтәлләрдики иҗтимаий таратқуларда актип һәрикәт қиливатқан 350 дин артуқ сахта һесабатларни байқиған.

Бу орган елан қилған доклатта ейтилишичә, сахта һесаблар даим хитай һөкүмитини махтайдиған әмма хитай һөкүмитигә қарши турғучиларни чүшүридиған йолланмиларни тарқитидикән. Буниңдики мәқсәт ғәрбниң образини чүшүрүп, хитайниң чәтәлдики тәсири вә образини ашуруш икән.

Бәзи һесабатлар-Twitter, Facebook, Instagram вә YouTube ға тарқалған болуп, бу һесабатлар сүний әқил билән һасил қилинған баш сүрәтләрни ишлитидикән. Бәзилири оғриланған һесабатлар икән.

Гәрчә бу сахта һесабатларниң хитай һөкүмити билән мунасивити барлиқи тоғрисида ениқ пакит болмисиму, әмма бу һесабатлар илгири Twitter вә Facebook тәрипидин чәкләнгән хитайни қоллайдиған һесабатларға охшайдикән. Тарқатқан мәзмунлириму хитайниң һөкүмәт ахбаратлири вә һөкүмәт вәкиллири тарқатқан учурларға охшайдикән. Улар ортақлашқан мәзмунларниң көпинчиси америкаға мунасивәтлик болуп, американиң ички сияситидики сәзгүр мәсилиләрни қочуйдикән, американи һәдәп кишилик һоқуқ хатириси начар дәп тәсвирләйдикән. Болупму улар хитай һөкүмитиниң уйғурларға йүргүзүватқан ирқий қирғинчилиқини қаттиқ инкар қилип уни "америка вә ғәрб тәрипидин тоқулған ялған" дәйдикән.

Диққәт қозғайдиғини, бу сүний әқил техникиси билән ясап чиқилған һесабатларниң көпи түркчә исим-фамилә қоллинидикән. Бу исимлар оғриланған болуши мумкинкән. Фейсбук вә ютуб қатарлиқлар бундақ сахـта һесабатларни өчүрүлгәнликини елан қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт