Sün'iy eqil téxnikisi bilen yasap chiqilghan saxta hésabatlar xitay teshwiqatini qilish üchün qollinilghan

Muxbirimiz irade
2021-08-05
Share

BBC Torining xewer qilishiche, yéqinda saxta uchurlargha qarshi pa'aliyet qilidighan "Uchur qarshiliqi merkizi" namliq bir tetqiqat orni chet'ellerdiki ijtima'iy taratqularda aktip heriket qiliwatqan 350 din artuq saxta hésabatlarni bayqighan.

Bu organ élan qilghan doklatta éytilishiche, saxta hésablar da'im xitay hökümitini maxtaydighan emma xitay hökümitige qarshi turghuchilarni chüshüridighan yollanmilarni tarqitidiken. Buningdiki meqset gherbning obrazini chüshürüp, xitayning chet'eldiki tesiri we obrazini ashurush iken.

Bezi hésabatlar-Twitter, Facebook, Instagram we YouTube gha tarqalghan bolup, bu hésabatlar sün'iy eqil bilen hasil qilin'ghan bash süretlerni ishlitidiken. Beziliri oghrilan'ghan hésabatlar iken.

Gerche bu saxta hésabatlarning xitay hökümiti bilen munasiwiti barliqi toghrisida éniq pakit bolmisimu, emma bu hésabatlar ilgiri Twitter we Facebook teripidin cheklen'gen xitayni qollaydighan hésabatlargha oxshaydiken. Tarqatqan mezmunlirimu xitayning hökümet axbaratliri we hökümet wekilliri tarqatqan uchurlargha oxshaydiken. Ular ortaqlashqan mezmunlarning köpinchisi amérikagha munasiwetlik bolup, amérikaning ichki siyasitidiki sezgür mesililerni qochuydiken, amérikani hedep kishilik hoquq xatirisi nachar dep teswirleydiken. Bolupmu ular xitay hökümitining Uyghurlargha yürgüzüwatqan irqiy qirghinchiliqini qattiq inkar qilip uni "Amérika we gherb teripidin toqulghan yalghan" deydiken.

Diqqet qozghaydighini, bu sün'iy eqil téxnikisi bilen yasap chiqilghan hésabatlarning köpi türkche isim-famile qollinidiken. Bu isimlar oghrilan'ghan bolushi mumkinken. Féysbuk we yutub qatarliqlar bundaq saxـta hésabatlarni öchürülgenlikini élan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet