Uyghur aptonom rayonida 52-qétimliq axbarat élan qilish yighini échilghan

• Muxbirimiz jewlan
  2021-08-13

Xitay taratqulirining xewer qilishiche, Uyghur aptonom rayonluq hökümet 8-ayning 12-küni ürümchide “Shinjang mesilisi toghruluq axbarat élan qilish yighini” ötküzgen.

Bu yighinda Uyghur aptonom rayonluq hökümet bayanatchisi shu guyshyang söz qilip, amérikani “Irqiy qirghinchiliq élip bérip, indiyanlarni qirghan dölet؛ irqiy kemsitish élip bérip, qara tenliklerni xorlighan dölet” dep qarilashni dawam qilghan hemde “Amérikaning shinjang mesiliside gep qilidighan salahiyiti yoq, shinjangning neride lagér bar iken, qaysi yéri dozaxqa oxshaydiken?” dep jar salghan. U yene “Amérikaning hemmige qol sozush qilmishi we aqiwitini oylimay ish qilishi uni halaketke élip baridu” dégen.

Xitay ijtima'iy penler akadémiyisi amérika tetqiqat orni tetqiqatchisi lyu wéydung amérikadiki diniy erkinlikining emeliyette xiristiyan dini erkinliki ikenlikini, musulmanlarning kemsitilidighanliqini éytqan؛ shinjang uniwésitétidin zulhayat isma'il shüy guyshyangning sözini quwwetlep, amérikaning tarixta ikki yérim milyon indiyanni qirghanliqi we ularning medeniyitini yoqatqanliqini “Misal keltürgen”.

Yighinda yene “Amérika hékayisi”, “Amérika toziqi” namliq höjjetlik filimler qoyulup, amérikaning “Ötmüshtiki jinayetliri”, gherbke yürüsh herikitidiki “Mejburiy emgek” körünüshliri körsitilgen.

Tehlilchilerning qarishiche, xitay xewerliride körsitilgendek, amérika dölet mejlisi ezalirining Uyghur rayonigha munasiwetlik qanun-layihesini resmiy qanun'gha aylandurush tirishchanliqi xitay hökümitini bi'aram qilghan. Xitay teshwiqat orunliri yighinda nechche esir aldidiki weqelerni köptürüp, amérikani qarilashqa we bügünki irqiy qirghinchiliq jinayitini yoshurushqa urun'ghan bolup, ötmüshni bügün'ge sélishturushi qanche bimenilik bolsa, qanun we adalet, diniy erkinlik jehette özini amérikidin üstün orun'gha qoyushimu shunche külkiliktur.