Үрүмчидә «террорлуқ, радикаллиққа қарши туруш вә кишилик һоқуқни қоғдаш» хәлқара муһакимә йиғини чақирилған

Мухбиримиз әркин
2019-09-06
Елхәт
Пикир
Share
Принт

Уйғур районида 2 милйондәк мусулман йиғивелиш лагерлириға қамилип, уйғур җәмийитигә қарита омумйүзлүк диҗитал назарәт йолға қойған бир мәзгилдә хитайдики бир қанчә җәмийәт вә университет үрүмчидә «террорлуқ вә радикаллиққа қарши туруш, кишилик һоқуқни қоғдаш» хәлқара муһакимә йиғини чақирған. Хитай таратқулириниң хәвәр қилишичә, 6‏-сентәбир күни башланған йиғинға һиндистан, түркийә, афғанистан вә хитайни өз ичигә алған 18 дөләт һәм хәлқара тәшкилатниң 60 тәк тәтқиқатчиси вә мутәхәссиси қатнишип, «террорлуққа қарши туруш, радикаллиқни түгитиш күришидики инсанпәрвәрлик вә кишилик һоқуқни қоғдаш, хәлқара һәмкарлиқ елип бериш қатарлиқ темилар» да пикир алмаштурған.

Хитай һөкүмитиниң «террорлуқ», «радикаллиққа» қарши туруш намида 2 милйондәк уйғур, қазақ вә башқа йәрлик мусулманни лагерларға қамиши, б д т, хәлқара кишилик һоқуқ тәшкилатлири вә америка башчилиқидики ғәрб дөләтлириниң қаттиқ тәнқидигә учрап кәлгәниди. Бу йиғинниң дәл мушу пәйттә чақирилиши көзәткүчиләрниң диққитини қозғимақта. Шинхуа агентлиқиниң хәвиридә қәйт қилинишичә, йиғинда хитай мәркизи тәшвиқат бөлүминиң муавин башлиқи җяң җйәнго хәлқара җәмийәтни хитайниң «террорлуқ» вә «радикаллиққа» қарши турушта таллиған күрәш йолини һөрмәт қилишқа чақирған. У хәлқара җәмийәт «һәр қайси дөләт хәлқлириниң террорлуққа қарши туруш, радикаллиқни түгитиш йолини өзи таллишиға һөрмәт қилиши, өзиниң ирадисини башқиларға теңишқа қарши туруши керәклики» ни тәкитлигән. 

Йиғинда уйғур аптоном райониниң рәиси шөһрәт закир «қайта-тәрбийәләш лагерлири» ни ақлап, аталмиш «кәспий техника тәрбийиләш мәркәзлири» ниң «радикаллиқниң ямиришиниң үнүмлүк алдини алғанлиқи» ни илгири сүргән. Һалбуки, хитай һөкүмити өзиниң мәзкур райондики изчил ақлап кәлгән болсиму, лекин хәлқара көзәткүчиләр униң қилмишиниң «террорлуққа» қарши туруш билән алақиси йоқлуқи, униң уйғурларға қарита «мәдәнийәт қирғинчилиқи» елип бериватқанлиқини илгири сүрмәктә.

Пикирләр (0)
Share
Толуқ бәт