Ürümchide "Térrorluq, radikalliqqa qarshi turush we kishilik hoquqni qoghdash" xelq'ara muhakime yighini chaqirilghan

Muxbirimiz erkin
2019-09-06
Élxet
Pikir
Share
Print

Uyghur rayonida 2 milyondek musulman yighiwélish lagérlirigha qamilip, Uyghur jem'iyitige qarita omumyüzlük dijital nazaret yolgha qoyghan bir mezgilde xitaydiki bir qanche jem'iyet we uniwérsitét ürümchide "Térrorluq we radikalliqqa qarshi turush, kishilik hoquqni qoghdash" xelq'ara muhakime yighini chaqirghan. Xitay taratqulirining xewer qilishiche, 6‏-séntebir küni bashlan'ghan yighin'gha hindistan, türkiye, afghanistan we xitayni öz ichige alghan 18 dölet hem xelq'ara teshkilatning 60 tek tetqiqatchisi we mutexessisi qatniship, "Térrorluqqa qarshi turush, radikalliqni tügitish kürishidiki insanperwerlik we kishilik hoquqni qoghdash, xelq'ara hemkarliq élip bérish qatarliq témilar" da pikir almashturghan.

Xitay hökümitining "Térrorluq", "Radikalliqqa" qarshi turush namida 2 milyondek Uyghur, qazaq we bashqa yerlik musulmanni lagérlargha qamishi, b d t, xelq'ara kishilik hoquq teshkilatliri we amérika bashchiliqidiki gherb döletlirining qattiq tenqidige uchrap kelgenidi. Bu yighinning del mushu peytte chaqirilishi közetküchilerning diqqitini qozghimaqta. Shinxu'a agéntliqining xewiride qeyt qilinishiche, yighinda xitay merkizi teshwiqat bölümining mu'awin bashliqi jyang jyen'go xelq'ara jem'iyetni xitayning "Térrorluq" we "Radikalliqqa" qarshi turushta tallighan küresh yolini hörmet qilishqa chaqirghan. U xelq'ara jem'iyet "Her qaysi dölet xelqlirining térrorluqqa qarshi turush, radikalliqni tügitish yolini özi tallishigha hörmet qilishi, özining iradisini bashqilargha téngishqa qarshi turushi kérekliki" ni tekitligen. 

Yighinda Uyghur aptonom rayonining re'isi shöhret zakir "Qayta-terbiyelesh lagérliri" ni aqlap, atalmish "Kespiy téxnika terbiyilesh merkezliri" ning "Radikalliqning yamirishining ünümlük aldini alghanliqi" ni ilgiri sürgen. Halbuki, xitay hökümiti özining mezkur rayondiki izchil aqlap kelgen bolsimu, lékin xelq'ara közetküchiler uning qilmishining "Térrorluqqa" qarshi turush bilen alaqisi yoqluqi, uning Uyghurlargha qarita "Medeniyet qirghinchiliqi" élip bériwatqanliqini ilgiri sürmekte.

Toluq bet