“Shinjang yaxshi jay” tor söhbet yighinigha qatnashqan parizh chong meschitining imami Uyghurlardin epu sorighan

Bu yil 7-ayda xitayning “Shinjang yaxshi jay” namidiki tor yighinigha qatniship, Uyghurlar we kishilik hoquq teshkilatlirining naraziliqigha uchrighan fransiyediki parizh chong meschitining imami shemshiddin hafiz Uyghurlardin epu sorighan. Shemshiddin hafizning xitay elchixanisi uyushturghan “Shinjang yaxshi jay” tor yighinigha qatnishishi fransiyediki “Yawropa Uyghur inistituti” ning mudiri dilnur reyhan we lagér shahiti gülbahar jélilowaning qattiq naraziliqigha uchrighan. Ular shemshiddin hafizgha xet yézip, uning bilen körüshüshni telep qilghan idi.

Dilnur réyhanning 10-séntebir ijtima'iy taratqularda bergen uchuridin melum bolushiche, shemshiddin hafiz 9-séntebir dilnur reyhan bilen gülbahar jélilowani özining parizh chong meschitidiki ishxanisigha teklip qilip, ular bilen körüshken. U ‍özining “Bir musulman rehber bolush süpitide xitay bash elchisining Uyghurlargha qiliniwatqan basturushlargha qandaq chüshenche béridighanliqini bilip béqish üchün körüshkenliki” we tor yighinigha qatnashqanliqini, biraq “Héchbir qana'etlen'güdek jawap chimighanliqi” ni éytqan.

Dilnur reyhanning éytishiche, shemshiddin hafiz yene “Eslide yaxshi niyette qilghan bu herkiti eger Uyghurlargha azap élip kelgen bolsa, barliq Uyghurlardin kechürüm soraydighanliqi” ni bildürgen. Shemshiddin hafizning köpligen musulman döletler, hetta talibandek eng radikal islamchi guruhlarmu xitayning teripini tutuwatqan bir waqitta, barliq Uyghurlardin kechürüm sorishi diqqet qozghidi.