Чәт әлләрдики хитай муһаҗирлар җәмийәтлири хитайниң уйғур ирқий қирғинчилиқини инкар қилиш тәшвиқатиға актип маслашқан

Мухбиримиз ирадә
2021-09-30
Share

Хитай һөкүмитиниң уйғурларға қаритиватқан ирқий қирғинчилиқини инкар қилиш тәшвиқат җеңида чәт әлләрдики хитай муһаҗирлар җәмийәтлириниң актиплиқ билән маслишиватқанлиқи мәлум болмақта.

Хитай һөкүмити уйғурларға ирқий қирғинчилиқ йүргүзүватқанлиқи һәққидики тәнқидләргә қарши кәң көләмлик тәшвиқат һәрикитини қанат яйдурмақта. Хитай һөкүмити уюштурған бу хилдики тәшвиқат йиғинларниң бири27-сентәбир күни үрүмчидә екран арқилиқ ечилған.

Хитайниң "тәңритағ тори" ниң хәвиридин қариғанда, йиғинда америка, әнгилийә, германийә, франсийә, авистиралийә, росийә, канада, японийә, сәуди әрәбистан, мисир, түркийә, йеңи зеландийә, голландийә, шивитсийә, һиндинозийә, пакистан, қазақистан, қирғизистан, өзбекистан қатарлиқ 20 дөләттики хитай муһаҗирлар җәмийәтлириниң вәкиллири вә шу дөләтләрдә турушлуқ әлчихана хадимлири тор арқилиқ бу йиғинға қатнашқан.

Екран йиғинида уйғур аптоном райониниң муавин рәиси әркин тунияз гәп йорғилитип: "шинҗаң һазир тарихтики әң яхши тәрәққият басқучида турмақта. Америка вә ғәрбтики хитайға қарши күчләр шинҗаң хәлқиниң яхши турмуш кәчүрүватқанлиқини көрмәсликкә салди. ‹Җаза лагери', ‹ирқий қирғинчилиқ' қатарлиқ нәччә йүз йиллиқ ялғанчилиқни тарқатти. . . Уларниң түп мәқсити шинҗаңға мунасивәтлик мәсилиләрни йоғинитип, шинҗаңни муқимсизлаштуруш вә җуңгониң тәрәққиятиға тосқунлуқ қилиштур," дегән.

Хәвәрдә ейтилишичә, йиғинда йәнә канада, әнгилийә вә германийә қатарлиқ дөләтләрдә турушлуқ хитай муһаҗирлар җәмийәтлириниң башлиқлиридин ваң венкаң, йе зиңя вә хуа пиң қатарлиқларму сөз қилған. Улар бир еғиздин "ғәрбтики сиясәтчиләр расـт гәп қилмайду, биз өзимиз турушлуоқ дөләтләрдики аммиға шинҗаңдики әмәлийәтни тәшвиқ қилимиз. Бизниң шундақ қилиш мәсулийитимиз вә мәҗбурийитимиз бар," дегән.

Хитай даирилириниң уйғурларға қаритиватқан ирқий қирғинчилиқи хәлқарада күчлүк тәнқидкә учриғандин кейин, хитай мушу хилдики ахбарат елан қилиш йиғини вә син йиғинлири арқилиқ хәлқара җамаәтниң пикир еқимиға қарши тәшвиқат һәрикитини қанат яйдурған иди. Чәт әлләрдики уйғур көзәткүчиләрниң қаришичә, юқириқи хитай муһаҗирлар җәмийәтлири вәкиллириниң сөзи, хитай һөкүмитиниң бу тәшвиқат һәрикитидә хитай муһаҗир тәшкилатлиридин пайдилинишни йәниму күчәйтиватқанлиқини көрситип беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт