Uyghur élide ziyarette bolghan islam hemkarliq teshkilati wekiller ömiki “Shinjangning tereqqiyatigha heyran qalghan”
2024.10.21
Xitay hökümiti Uyghurlargha irqiy qirghinchiliq qilghanliqigha da'ir eyibleshlerni inkar qilish diplomatik teshwiqatini qattiq kücheytiwatqan bir peytte, islam hemkarliq teshkilatigha eza döletler we bu teshkilatning bash katibat mes'ulliridin teshkil tapqan bir wekiller ömiki ötken heptining axiri Uyghur élide yene ziyarette bolghan.
Xitay hökümet taratqulirining xewerliride, 32 kishilik wekiller ömikining 16-öktebirdin 19-öktebirgiche ürümchi, turpan, qumul qatarliq jaylarda ziyarette bolup, “Rayondiki perqliq milletler arisidiki ijtima'iy muqimliq, inaqliq we ortaq tereqqiyattin heyran qalghanliqi” ni bildürgenliki qeyt qilinmaqta. Bu islam hemkarliq teshkilatigha eza döletler we bu teshkilat mes'ullirining 2023-yili 8-aydin béri Uyghur élide 2-qétim ziyarette bolushi we xitayning rayondiki siyasitini ashkara qollishidur.
Halbuki, b d t kishilik hoquq ali komissarliqi xitayning Uyghurlargha tutqan mu'amilisi “Insaniyetke qarshi jinayet teshkil qilishi mumkin” dep körsetken ehwaldimu, musulman wekiller ömikining “Rayondiki ijtima'iy muqimliq, inaqliq we ortaq tereqqiyattin heyran qalghanliqi” ni bildürüshi, gherb bilen musulman ellirining Uyghurlar mesilisidiki chongqur pikir ixtilapini körsitidu dep qaralmaqta. Melum bolushiche, wekiller ömiki islam hemkarliq teshkilatining mes'ulliridin sirt, se'udi erebistan, tajikistan, kaméron, iran, mali qatarliq döletlerning islamiy hemkarliq teshkilatida turushluq wekilliridin teshkil tapqan iken.
“Shinxu'a agéntliqi” ning bu heqtiki xewiride, bu ziyaretni xitay tashqiy ishlar ministirliqining orunlashturghanliqi bildürülgen. Ziyarette se'udi erebistanning islam hemkarliq teshkilatida turushluq mu'awin wekili xani abdulwahab kashif, “Shinjangning obrazini dunyagha téximu toghra tonutush üchün öz'ara tesirni kücheytishning muhimliqi” ni tekitligen. “Xitay yer shari waqti” gézitining körsitishiche, Uyghur aptonom rayonluq partkom sékrétari ma shingrüy 18-öktebir wekiller ömiki bilen körüshüp, amérika bashchiliqidiki gherb ellirining Uyghurlar mesilisidiki siyasitige hujum qilghan.