Уйғур дияридики қариму-қарши тәшвиқат мәнзирилири гуман қозғимақта

2020-12-01
Share

Хитай һөкүмитиниң тәшвиқат, әдлийә вә қанун омумлаштуруш ишханилириниң орунлаштуриши бойичә 30-ноябирдин 6-декабирғичә пүткүл уйғур диярида "асасий қанун тәшвиқат һәптилики" паалийити өткүзүлидикән. "шинҗаң гезити" ниң 1-декабирдики хәвиридә ейтилишичә, әдлийә назаритиниң назири әнвәр сейит шу күнки нәқ мәйдан йиғинида "асасий қанун билән ‹шинҗаң хизмәт йиғини' ни зич бирләштүргән һалда ши җинпиңниң қанун арқилиқ идарә қилиш идийисини әмилиләштүрүш" һәққидә нутуқ сөзлигән.

Хәвәрдин мәлум болушичә, бу қетимқи "асасий қанун тәшвиқат һәптилики" һәрқайси шәһәрләрдин әң чәт йеза-қишлақларғичә болған җайлардики барлиқ идарилар, мәктәпләр, мәһәллиләр, карханилар вә мәсчитләрдә өткүзилидикән. Буниңда мушу темини чөридигән түрлүк паалийәтләр арқилиқ асасий қанун еңи, дөләт еңи, шундақла "җуңхуа миллити ортақ гәвдисини тән елиш еңи" қатарлиқларни өстүрүш мәқсәд қилинидикән.

Һалбуки, йеқинқи йиллардин буян уйғур диярида хитай "асасий қануни" да бәлгиләнгән уйғурларниң барлиқ һәқлири, җүмлидин өз тил-йезиқини қоллиниш әркинлики, диний етиқад әркинлики дегәнләрниң пүтүнләй бикар қилинғанлиқи, бу һәқләрни иҗра қилиш һәққидә сөз қилған уйғур зиялиси илһам тохтиниң "дөләтни парчилаш вә бөлгүнчилик қилиш" билән әйиблинип муддәтсиз қамаққа һөкүм қилинғанлиқидәк көплигән асасий қанунға хилап қилмишларниң йүз бәргәнлики, бу хил "асасий қанунға хилаплиқ қилиш" қилмишини хитай һөкүмитиниң баш болуп иҗра қиливатқанлиқи һәққидә нурғун хәвәрләр оттуриға чиққан иди. Әмдиликтә хитай һөкүмитиниң бир өрүлүпла "асасий қанунни тәшвиқ қилиш" һәққидә вәзханлиқ қилишидин муһаҗирәттики кишиләр бәкму һәйранлиқ һес қилмақта икән.

Шуниң билән бир вақитта "хитай һәрбий ишлар тори" ниң 1-декабирдики хәвиридә ейтилишичә, хитай армийәсиниң мәлум топчилар полки тәклимакан районида әмәлий топ етиш манивери қилған. Нөвәттә тәқлидий "дүшмән" истиһкамлириға еғир типтики зәмбирәкләр арқилиқ һуҗум қилиш манивериниң зади кимни "дүшмән" дәп тәсәввур қиливатқанлиқи, һәрқайси җайлардики "асасий қанун тәшвиқат һәптилики" билән бирләшкән һалда көплигән гуманларни туғдурмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт