Xitay hökümiti mexsus axbarat yighini échip, Uyghur rayonidiki yesli ma'aripini aqlighan

Xitay hökümitining Uyghurlargha irqiy qirghinchiliq qiliwatqanliqi we buni asasliq halda Uyghur nopusining köpiyishini cheklesh hemde Uyghur balilirini xitaylashturush siyasiti arqiliq ijra qiliwatqanliqi keng ashkariliniwatqan mushu peytlerde, Uyghur aptonom rayonluq da'iriler mexsus axbarat yighini échip, Uyghur élidiki oqush yéshigha toshimighan balilar ma'aripining tarixtiki eng yaxshi sewiyede ikenlikini ilgiri sürgen.

Xitayning “Tengritagh tori” da mundaq déyilgen: “12-Ayning 8-küni shinjang Uyghur aptonom rayoni oqush yéshigha toshmighanlar ma'aripi üchün mexsus axbarat élan qilish yighini chaqirip, shinjang ma'aripining heqiqiy tereqqiyatini tonushturdi hemde amérika we gherbtiki junggogha qarshi küchler qesten peyda qilghan munasiwetlik yalghanchiliqlargha reddiye berdi.”

Mezkur yighinda xitay rehberliri Uyghur élida yesli ma'aripining tereqqiy qildurulup, yéza balilirining bay-kembeghelliki ayrilmay turup, yéza yeslilirige orunlashturulghanliqini, ularning zamaniwi ma'ariptin behirliniwatqanliqini ilgiri sürgen. Axbarat yighinida ular aqsu, ürümchi we chöchek qatarliq jaylardiki yesli balilirining sinlirini muxbirlargha körsitip, bu balilarning pakize azade muhitlarda xoshal – xoram ösüp yétiliwatqanliqini ilgiri sürgen.

Xitay hökümiti bu xildiki teshwiqatlirini ilgirimu köp qétim élip barghan. Emma ularning bundaq teshwiqatlirigha qarshi sözligen mutexessiler we kishilik hoquq pa'aliyetchiliri, xitay hökümitining bu teshwiqatliri bilen milyonlighan Uyghurni lagérlargha qamap, a'ililerni parchilap, yüz minglighan Uyghur balilirini tirik yétimlargha aylandurghanliqi, ularni xitay tili we medeniyiti bilen terbiyelewatqanliqidek pakitni özgertelmeydighanliqini, balilar eng xoshal, eng bextlik chong bolidighan yerning ata – ana we a'ilisining baghri bolidighanliqini tekitleshken idi.

Halbuki, axbarat yighinida xitay emeldarliri “14-Besh yilliq pilan” mezgilide, Uyghur élining herqaysiy sheher-bazarlardiki yeslilerni bir tutash pilanlash we bashqurushning dawamliq ishqa ashurulidighanliqini bildürgen.