Хитай һөкүмити мәхсус ахбарат йиғини ечип, уйғур районидики йәсли маарипини ақлиған

• Мухбиримиз ирадә
  2021-12-09

Хитай һөкүмитиниң уйғурларға ирқий қирғинчилиқ қиливатқанлиқи вә буни асаслиқ һалда уйғур нопусиниң көпийишини чәкләш һәмдә уйғур балилирини хитайлаштуруш сиясити арқилиқ иҗра қиливатқанлиқи кәң ашкарилиниватқан мушу пәйтләрдә, уйғур аптоном районлуқ даириләр мәхсус ахбарат йиғини ечип, уйғур елидики оқуш йешиға тошимиған балилар маарипиниң тарихтики әң яхши сәвийәдә икәнликини илгири сүргән.

Хитайниң “тәңритағ тори” да мундақ дейилгән: “12-айниң 8-күни шинҗаң уйғур аптоном райони оқуш йешиға тошмиғанлар маарипи үчүн мәхсус ахбарат елан қилиш йиғини чақирип, шинҗаң маарипиниң һәқиқий тәрәққиятини тонуштурди һәмдә америка вә ғәрбтики җуңгоға қарши күчләр қәстән пәйда қилған мунасивәтлик ялғанчилиқларға рәддийә бәрди.”

Мәзкур йиғинда хитай рәһбәрлири уйғур елида йәсли маарипиниң тәрәққий қилдурулуп, йеза балилириниң бай-кәмбәғәллики айрилмай туруп, йеза йәслилиригә орунлаштурулғанлиқини, уларниң заманиви маариптин бәһирлиниватқанлиқини илгири сүргән. Ахбарат йиғинида улар ақсу, үрүмчи вә чөчәк қатарлиқ җайлардики йәсли балилириниң синлирини мухбирларға көрситип, бу балиларниң пакизә азадә муһитларда хошал – хорам өсүп йетиливатқанлиқини илгири сүргән.

Хитай һөкүмити бу хилдики тәшвиқатлирини илгириму көп қетим елип барған. Әмма уларниң бундақ тәшвиқатлириға қарши сөзлигән мутәхәссиләр вә кишилик һоқуқ паалийәтчилири, хитай һөкүмитиниң бу тәшвиқатлири билән милйонлиған уйғурни лагерларға қамап, аилиләрни парчилап, йүз миңлиған уйғур балилирини тирик йетимларға айландурғанлиқи, уларни хитай тили вә мәдәнийити билән тәрбийәләватқанлиқидәк пакитни өзгәртәлмәйдиғанлиқини, балилар әң хошал, әң бәхтлик чоң болидиған йәрниң ата – ана вә аилисиниң бағри болидиғанлиқини тәкитләшкән иди.

Һалбуки, ахбарат йиғинида хитай әмәлдарлири “14-бәш йиллиқ пилан” мәзгилидә, уйғур елиниң һәрқайсий шәһәр-базарлардики йәслиләрни бир туташ пиланлаш вә башқурушниң давамлиқ ишқа ашурулидиғанлиқини билдүргән.